Reseıde shekteý sharalaryn mamyr merekelerine deıin uzartý usynyldy
MÁSKEÝ. QazAqparat – Reseıde COVID-19 indeti sharyqtaý shegine jetti dep aıtý erterek, jaǵdaıdy qadaǵalaý kerek. Bul týraly baspasóz máslıhatynda RF Densaýlyq saqtaý mınıstrliginiń shtattan tys bas mamany-epıdemıolog Nıkolaı Brıko málimdedi, dep habarlaıdy QazAqparattyń menshikti tilshisi.
«Sońǵy birneshe kúnde ósim (kúndelikti ósim) 8-10% boldy, árıne, bul burynǵyǵa qaraǵanda 15-17% az. Biraq aýrý órshýiniń shyrqaý shegine jettik dep aıtýǵa áli erte. Jaǵdaıdy qadaǵalaý kerek, ne bolatynyn kóreıik. Qandaı da bir qorytyndy jasaý úshin keminde bir apta qajet», - dep atap ótti N.Brıko.
N.Brıko sonymen qatar koronavırýstyń taralýymen kúresý úshin Reseı Federatsııasyna engizilgen shekteý sharalaryn mamyr meıramdary qarsańynda uzartý qajet ekenin aıtty.
Jedel shtabtyń málimetine sáıkes, elde sońǵy táýlikte 5236 adam COVID-19 juqtyrǵan. Al koronavırýs juqtyrǵandardyń jalpy sany – 57999. 4420 adam saýyǵyp, aýrýhanadan shyqty.
Bir kún ishinde 57 patsıent kóz jumǵan. Іndetten qaıtys bolǵandar sany – 513 adam.
Avtor: Medet Ahmetov
Foto: tass.ru