Reseıde shaǵyn qalalar joıylyp ketý aldynda tur

MÁSKEÝ.KAZINFORM - Búkilreseılik qoǵamdyq pikirdi zertteý ortalyǵynyń (BRPZO) baıandamasyna sáıkes, Reseıdegi monoqalalar turǵyndardyń megapolıster men iri qalalarǵa jappaı kóshýi saldarynan joıylý qaýpine tap bolýy múmkin, dep habarlaıdy agenttik tilshisi reseılik BAQ derekterine cilteme jasap.

Baıandamada shaǵyn qalalarda halyq sanynyń azaıýyna negizgi sebep retinde jastardyń kóship ketýi jáne aǵa býynnyń tabıǵı túrde azaıǵany atalady.

Mundaı eldi mekenderde jyl saıyn úı sharýashylyqtarynyń jalpy sany azaıyp keledi, ınfraqurylym jetkiliksiz, bilim alý men qyzmette ósý múmkindikteri shekteýli, sondaı-aq jastarǵa týǵan jerinde damý bolashaǵyn kórýge múmkindik beretin ómirlik baǵyttardyń joqtyǵy seziledi.

Zertteý nátıjeleri boıynsha, jastar arasyndaǵy pessımızm shaǵyn qalalarda kóbirek baıqalady: olardyń tek 33%-y bolashaqqa optımıstik senimmen qaraıdy (megapolısterde bul kórsetkish - 53%). Osyndadaı qalalardaǵy azamattardyń shamamen 38%-y tıimdi jumys usynysy bolǵan jaǵdaıda basqa qalaǵa kóshýge daıyn ekeni aıtylǵan.

Sotsıologtar 1950 jyldan 2030 jylǵa deıin iri qalalardan tys aımaqtardaǵy halyq sany 36%-ǵa azaıady, al halqy 500 myńnan joǵary qalalarda turǵyndar sany 25%-ǵa ósedi dep boljaıdy.

Halyqtyń kóship ketýine jergilikti, óńirlik jáne federaldyq deńgeıdegi memlekettik ınstıtýttardyń jumysy da áser etedi.

Shaǵyn qalalardy saqtap qalý joldarynyń biri retinde BRPZO bul eldi mekenderde týrızmdi damytý múmkindigin usynady.

Esterińizge sala keteıik, buǵan deıin Qazaqstannyń monoqalalarynyń bolashaǵy týraly, onda ındýstrııalandyrýǵa basymdyq beriletini habarlanǵan bolatyn.