Reseıde Sankt-Peterbýrg halyqaralyq ekonomıkalyq forýmy ótip jatyr
ASTANA. KAZINFORM – Reseıdiń soltústik astanasynda Sankt-Peterbýrg halyqaralyq ekonomıkalyq forýmy (SPIEF) óz jumysyn bastady.
Atalǵan shara 5-8 maýsym aralyǵynda Expoforum kongress-kórme ortalyǵynda ótedi. Forýmǵa 136 elden 18 myńnan astam ókil – memleket basshylary, iri kompanııalardyń basshylary, qoǵam jetekshileri men jastar qatysady. 2024 jylǵy SPEF-nyń qonaǵy Oman memleketi boldy.
Іskerlik baǵdarlamaǵa 1,5 myńǵa jýyq spıker men sarapshy qatysady. Forýmǵa qatysatyn qazaqstandyq delegatsııanyń quramynda memlekettik organ, bıznes ókilderi jáne dıplomattar bolady.
Forým bastalatyn sársenbi kúni memleket, shaǵyn jáne orta bıznes ókilderiniń taqyryptyq talqylaýlary uıymdastyrylyp, iskerlik áriptestikti damytý týraly kelisimderge qol qoıylady.
Beısenbi, 6 maýsymda forýmnyń negizgi is-sharalary bastalady, olar tórt taqyryptyq baǵytqa arnalǵan: «Reseı ekonomıkasy: jańa tsıkldiń maqsattary men mindetteri», «Álemdik ekonomıkanyń kóppolıarly modeline ótý», «Kóshbasshylyqty qamtamasyz etetin tehnologııalar», «Salaýatty qoǵam, dástúrli qundylyqtar jáne áleýmettik damý – memlekettiń basymdyqtary».
Sondaı-aq forým baǵdarlamasy onnan astam dıalogty qamtıdy, onyń ishinde: EAEO-ASEAN, Reseı-Afrıka, Reseı-Latyn Amerıkasy, Reseı-Qytaı jáne t.b.
Forýmnyń úshinshi, negizgi kúninde Reseı prezıdenti jáne basqa elderdiń shaqyrylǵan basshylarynyń, sonyń ishinde Serb Respýblıkasy, Bolıvııa jáne Zımbabve prezıdentteriniń qatysýymen plenarlyq otyrys ótedi.
Sońǵy kúni, 8 maýsymda Halyqaralyq jastar ekonomıkalyq forýmy ótip, onda jas menedjerler, kásipkerler, stýdentter men oqytýshylar ózekti máseleler boıynsha pikir almasady.
SPEF 1997 jyldan beri ótkizilse, 2006 jyldan bastap Reseı Federatsııasy Prezıdentiniń qamqorlyǵymen jáne qatysýymen ótkizilip keledi. Bul forým – bıznes-qoǵamdastyq ókilderi arasyndaǵy baılanys jáne Reseı men álemdik qaýymdastyq úshin ózekti ekonomıkalyq máselelerdi talqylaý úshin jetekshi reseılik alań.
