Reseıde samokat máselesi memleket basshysy deńgeıine kóterildi
MÁSKEÝ. KAZINFORM — Reseıde elektr samokattary men basqa da jeke qozǵalys quraldaryn paıdalaný taqyryby qoǵamda uzaq ýaqyt boıy pikirtalas týdyryp kelse, endi bul másele eń joǵary deńgeıge kóterildi. Prezıdent Vladımır Pýtın úkimetke olardy paıdalaný erejelerin qaıta qaraýdy tapsyrdy, dep habarlaıdy Kazinform agenttiginiń Máskeýdegi menshikti tilshisi.
Buǵan Azamattyq qoǵamdy damytý jáne adam quqyqtary jónindegi keńestiń otyrysy sebep boldy. Kreml saıtynda jarııalanǵan qujatqa sáıkes, Reseı Kólik mınıstrligi Іshki ister mınıstrligimen birlesip jaıaý júrginshiler qaýipsizdigi máselesimen tyǵyz aınalysýy tıis. Profıldi vedomstvolar mundaı sharalardyń oryndylyǵyn taldap, naqty usynystaryn bıylǵy jyldyń 1 shildesine deıin usynýy kerek.
Jeke qozǵalys quraldarynyń trotýarlar men jaıaý júrginshiler aımaqtarynda júrýine shekteýler engizý, tipti tolyq tyıym salý múmkindigi qarastyrylyp otyr. Olardyń qataryna elektr samokattary, elektr velosıpedter, skýterler, mono dóńgelekter jáne basqa da osyǵan uqsas qurylǵylar kiredi.
Qazir elektr velosıpedterge erekshe kóńil bólinip otyr. Óıtkeni olardy kýrerler men qala turǵyndary keptelis jaǵdaıynda qysqa qashyqtyqqa jyldam ári arzan barý úshin belsendi túrde paıdalanady. Dál osy qurylǵylardyń trotýarlarda retsiz qozǵalysy jaıaý júrginshilermen jıi janjal týǵyzady.
Buǵan deıin Almatyda jalǵa alynatyn samokattar paıdalanýshylarynyń quqyqtary men jasy tekseriletinin habarlaǵan bolatynbyz.