Reseıde Roza Baǵlanovanyń 100 jyldyǵyna arnalǵan merekelik is-sharalar ótip jatyr

NUR-SULTAN. QazAqparat – Bıyl álemge áıgili ánshi Roza Baǵlanovanyń 100 jyldyq mereıtoıy atap ótilýde. Osy dataǵa oraı elde aýqymdy is - sharalar-kontsertter, kórmeler, oǵan arnalǵan fılmderdiń tanystyrylymy men kórsetilimi t.b. kórermen nazaryna usynylyp keledi.

Halyqtyń súıikti ánshisiniń mereıtoıy Reseıde de toılanyp jatyr, dep habarlaıdy QazAqparat QR Mádenıet jáne sport mınıstrliginiń baspasóz qyzmetine silteme jasap.

Búgin Reseı astanasy Máskeý qalasynda fotokórme ashylyp merekelik kontsert ótti. Іs-sharaǵa Qazaqstannyń mádenıet jáne sport mınıstri Dáýren Abaev, zııaly qaýym men qazaq dıasporasynyń ókilderi qatysty.

«Osyndaı iri is-sharalar Qazaqstanda ǵana emes, basqa elderde de ótkizilip jatqany qýantady. Mundaǵy fotosýretterdiń árqaısysy Roza Baǵlanovanyń maǵynaly ómiriniń jarqyn sátterin ǵana emes, sonymen birge búkil dáýirdiń órleýin de beıneleıdi», - dedi mınıstr Dáýren Abaev halyq sharýashylyǵy jetistikteriniń kórmesi alańynda ótken kórmeniń ashylýy aıasynda.

Fotokórmede artıstiń ómiri men shyǵarmashylyǵynyń ártúrli qyryn tanytatyn 30-dan astam biregeı fotosýret qoıylǵan. Kórme 7 bólimnen turady: «Birinshi Roza», «Soǵys jyldaryndaǵy erlik pen dańq», «Shyǵarmashylyq shyńy», «Ár án — jaýhar», «Búkil álemdi jaýlap alǵan Roza», «Qoǵamdyq-saıası qyzmet» jáne «Halyq súıispenshiligine bólengen jarqyn ómir».

Dáýren Abaevtyń aıtýynsha, ánshiniń 100 jyldyǵy ıÝNESKO-nyń ataýly kúnder kúntizbesine engen, al qazan aıynda uıymnyń shtab-páterinde R.Baǵlanovanyń qurmetine úlken kontsert josparlanǵan. Sondaı-aq, qarasha aıynda Qazaqstan astanasynda halyqaralyq vokalıster baıqaýy ótedi.

«Roza Baǵlanova - dáýir sımvoly jáne halyqtyń súıiktisi. Qazaly óńirinen shyqqan týma talanttyń qazaq halqynyń mýzykasy men Qazaqstan kompozıtorlarynyń shyǵarmashylyǵyn elimizden tysqary jerlerge tanymal etýge jáne tanytýǵa qosqan zor úlesin aıtpaı ketý múmkin emes. Roza Baǵlanova Ekinshi Dúnıejúzilik soǵys jyldarynda kontserttik brıgada quramynda qyzyl armııa jaýyngerleriniń aldynda án aıtyp, maıdan dalasynan jaralanǵandardy alyp shyqty. Beıbit ýaqytta da Roza Tájibaıqyzy búkil álemge kontserttermen óner kórsetti, qoǵamdyq istermen belsendi aınalysty, qaıyrymdylyq sharalaryna qatysty», — dep atap ótti Dáýren Abaev merekelik kontsertte.

Aıta keteıik, kontserttik baǵdarlama aıasynda Roza Rymbaeva, Aıgúl Úlkenbaeva, Mádına Sádýaqasova, Rýhııa Baıdúkenova jáne basqa da otandyq tanymal artıster óner kórsetti.

Foto: gov.kz