Reseıde reper Oksımıronǵa izdeý jarııalandy

ASTANA. KAZINFORM – Reseı Іshki ister mınıstrligi reper Oksımıronǵa («shetel agentteri» tizilimine engizilgen Mıron Fedorov) izdeý salyp jatyr. Іzdeýdegi adamdardyń derekter bazasynda (sondaı-aq «shetel agentteri» tiziliminde) mýzykant kartasynyń paıda bolǵanyna «Medıazona» nazar aýdardy, dep habarlaıdy VVS. 

Kartada reperge qylmystyq áreket boıynsha izdeý jarııalanǵany jazylǵan, biraq qaı qylmysy úshin ekeni kórsetilmegen.

Oksımıronǵa qylmystyq is qozǵalǵany týraly resmı aqparat bolǵan joq.

TASS agenttigi quqyq qorǵaý organdaryndaǵy derekkózge silteme jasap, reperge «sheteldik agent» talaptaryn buzǵany úshin is qozǵalǵanyn jazdy (Oksımıron esimi 2022 jyldyń qazanynda «shetel agentteriniń» tizilimine engizilgen).

Osy bap boıynsha qylmystyq is bir jyl ishinde eki ret ákimshilik bap boıynsha jaýapkershilikke tartylǵan soń qozǵalýy múmkin.

Oksımıronnyń ózi Reseı bıliginiń oǵan nelikten izdeý salǵanyna ázirge túsinikteme bergen joq.

2023 jyldyń qazan jáne tamyz aılarynda Sankt-Peterbýrgtiń Kýıbyshev soty Mıron Fedorovqa (tólqujattaǵy aty-jóni) 40 jáne 50 myń rýbl kóleminde aıyppul saldy.

Tamyzda VKontakte áleýmettik jelisindegi jazbada «shetel agenti ekenin» belgilemegeni úshin, al qazanda — Reseı Ádilet mınıstrligine bılik «shetel agentterinen» talap etetin esepti usynbaǵany úshin.

2023 jyldyń basynda Sankt-Peterbýrgtiń Oktıabr soty da Oksımıronǵa onyń «Oıda» treginde separatızmge shaqyrý týraly qozǵalǵan ákimshilik is boıynsha 70 myń rýbl aıyppul saldy.

Budan buryn, 2022 jyldyń sońynda Sankt-Peterbýrgtiń Lenınskıı soty Oksımıronǵa armııany «qaralaý» baby boıynsha 45 myń rýbl aıyppul salǵan.

Buǵan mýzykanttyń aqpan aıynda Reseı Ýkraınaǵa jappaı basyp kirgen kezde jarııalaǵan soǵysqa qarsy beınerolıgi negiz boldy.

Shabýyl bastalǵannan keıin kóp uzamaı Oksımıron shetelge ketip, Ýkraınany qoldaý maqsatynda birqatar qaıyrymdylyq kontsert ótkizdi.