Reseıde Prımore jaǵalaýynda akýlalar paıda boldy
MÁSKEÝ. KAZINFORM — Reseıdiń Prımore ólkesi akvatorııasynda óńir úshin sırek kezdesetin qubylys — akýlalardyń jaǵalaýǵa jappaı jaqyndaýy tirkeldi. Bul týraly Baza Telegram-arnasy habarlady, dep jazady agenttik tilshisi.
Málimetke sáıkes, balyqshylar Pýtıatın araly mańynda mako akýlasyn aýlaǵan. Sondaı-aq Trıozere shyǵanaǵynda birneshe iri jyrtqysh baıqalǵan. Kýágerlerdiń aıtýynsha, olar katerlerdiń sońynan erip júrgen. Alǵashynda jergilikti turǵyndar bul janýarlardy delfındermen shatastyrǵanymen, keıin olardyń aq akýlalar bolýy múmkin ekenin boljaǵan.
Sarapshylar akýlalardyń Prımore jaǵalaýynda paıda bolýyn teńiz ekojúıesindegi ózgeristermen baılanystyrady. Reseı Úkimeti janyndaǵy Qarjy ýnıversıtetiniń professory Nadejda Kapýstına RuNews24 portalyna bergen túsiniktemesinde bul tabıǵı ári zańdy qubylys ekenin aıtty.
Onyń sózinshe, sý temperatýrasynyń kóterilýi jáne Tsýsıma aǵysynyń kúsheıýi Qıyr Shyǵys teńizderine sýbtropıkalyq sý massalarynyń kelýine yqpal etedi. Sonyń nátıjesinde qorektik tizbek ózgeredi: aldymen óńirge ıvası sardınasy keledi, keıin týnetster paıda bolady, al olardyń sońynan iri teńiz jyrtqyshtary jetedi.
— Munda negizgi róldi sý betiniń jylynýynan keıin qalyptasatyn qorektik baılanystar tizbegi atqarady, — dedi sarapshy.
Ol sondaı-aq akýlalardyń taralý aımaǵynyń keńeıýi eki faktormen baılanysty ekenin atap ótti: Qıyr Shyǵys teńizderiniń turaqty jylynýy jáne buryn qarqyndy aýlanǵan jyrtqyshtardyń popýlıatsııasynyń birtindep qalpyna kelýi.
Ǵalymdar Prımore sýlarynda mako akýlalarynyń paıda bolýy ábden múmkin ekenin rastaıdy. Sonymen qatar akýlalardyń kóptegen túriniń ishinde adamǵa naqty qaýip tóndiretinderi sanaýly ǵana. Olardyń qatarynda aq akýla, mako akýlasy jáne balǵa basty akýla bar.
Mamandardyń aıtýynsha, Qıyr Shyǵys jaǵalaýynda iri teńiz jyrtqyshtarynyń paıda bolýy ázirge jekelegen jaǵdaılarmen shektelip otyr. Alaıda klımattyq ózgerister jalǵasa berse, jylý súıgish túrlerdiń soltústik endikterde jıirek kezdesý yqtımaldyǵy artady.
Buǵan deıin Mysyrdaǵy tanymal kýrorttar jaǵalaýynda akýlalar sany kúrt artqanyn jazǵanbyz.
