Reseıde prezıdent saılaýy ótip jatyr
ASTANA. QazAqparat - Reseı Federatsııasynda jetinshi ret prezıdent saılaýy ótkizilýde. Saılaýda birinshi bolyp Reseıdiń qıyr shyǵysynda ornalasqan Kamchatka aımaǵy men Chýkotka avtonomdy okrýgynyń turǵyndary daýys berip jatyr, dep habarlaıdy «QazAqparat» HAA tilshisi TASS-qa silteme jasap.
Reseıdegi saılaý zańnamasy boıynsha el prezıdentin saılaý jergilikti ýaqytpen saǵat 08:00-den 20:00 aralyǵynda júrgiziledi. Dál osy kúni saılaýshylar úshin búkil Reseı ishinde 97 myńǵa jýyq saılaý ýchaskeleri jumys atqaratyn bolady.
RF terrıtorııasy 11 saǵattyq beldeýdi alyp jatqanyn eskersek, eldiń qıyr shyǵysynda ornalasqan Kamchatka aımaǵy men Chýkotka avtonomdy okrýgynyń turǵyndary daýys berýdi Reseıdiń ortalyq jáne batys bóliginde senbi kúngi keshki 23:00 bolyp jatqanda-aq bastap ketken. Sáıkesinshe, prezıdent saılaýynda daýys berý eldiń eń batys núktesinde ornalasqan Kalınıngrad qalasyndaǵy saılaý ýchaskeleri jabylǵanda toqtatylmaq. Alaıda, batys elderinde júrgen RF azamattary úshin daýys berý jergilikti ýaqyt boıynsha 20:00-ge deıin jalǵasa bermek.
Barlyq reseılikter tek saılaý ýchaskesine kelip daýys bere alady. Saılaý kúni orbıtada júrgen reseılik ǵaryshkerler ǵana Ushý saparlaryn basqarý ortalyǵymen baılanysý arqyly arnaıy teleseans kezinde senimdi ókil arqyly daýys bere alady. Dál búgin Ushý saparlaryn basqarý ortalyǵy Halyqaralyq ǵarysh stantsııasynda bortınjener Anton Shkaplerovtyń daýys berýin júzege asyrady.
Resmı málimetterge sáıkes, prezıdent saılaýy kezinde naýqannyń tynysh ótýine barlyq kúsh qurylymdaryn qosa eseptegende 532 myń adam men 110 myń arnaıy tehnıka jumyldyrylmaq.
2018 jyldyń 1 qańtaryndaǵy málimetterge sáıkes, Ortalyq saılaý komıteti daýys berýge quqyly 110 mıllıon 858 myń 228 saılaýshynyń baryn jarııalaǵan. Olardyń 108 mıllıon 968 myń 869-y Reseıde, 1 mıllıon 889 myń 359 adam shetelde daýys bere alady. Aıta keterligi, 2012 jylǵy sońǵy prezıdent saılaýynda 109 mıllıon 860 myń 331 saılaýshy tirkelgen bolatyn.
RF SІM resmı ókili Marııa Zaharovanyń habarlaýynsha, álemniń 145 elindegi 378 ýchaskede reseılik azamattar saılaýǵa qatysa alady.
Memlekettiń prezıdenttigine: LDPR kóshbasshysy Vladımır Jırınovskıı, KPRF atynan bıznesmen Pavel Grýdının, «Grajdanskaıa ınıtsıatıva» partııasynyń telejúrgizýshisi Ksenııa Sobchak, «ıAbloko» partııasynyń negizin qalaýshy Grıgorıı ıAvlınskıı, bıznes-ombýdsmen, Rost partııasynyń tóraǵasy Borıs Tıtov, «Kommýnısty Rossıı» partııasynyń atynan Maksım Sýraıkın, «Rossııskıı obşenarodnyı soıýz» partııasynyń kóshbasshysy Sergeı Babýrın, sonymen qatar, qazirgi prezıdent Vladımır Pýtın túsip jatyr. Pýtındi «Edınaıa Rossııa», «Spravedlıvaıa Rossııa», «Rodına», «Patrıoty Rossıı» partııalary men qoǵamdyq uıymdar qoldap otyr.
Aıta ketsek, 2012 jylǵa deıin Reseıde prezıdent 4 jylda bir saılanǵan bolatyn. 2008 jyly Konstıtýtsııaǵa ózgerister engizilgen soń ondaǵy prezıdent 6 jylda bir saılanady. Reseı prezıdenttigine jasy 35-ten joǵary, elde 10 jyldan astam ýaqyt turǵan adam saılana alady.
