Reseıde polıomelıt oqıǵasy tirkeldi

dep habarlaıdy «Maıak» radıosy.

RF Syrtqy ister mınıstrliginiń resmı ókili Andreı Nesterenkonyń habarlaýynsha, aýrý 9 aılyq baladan - Reseıdiń Irkýtsk oblysyna mamyrdyń 1-inde ata-anasymen kelgen Tájikstan azamatynan anyqtalyp otyr. Nesterenkonyń aıtýynsha, halyqaralyq standarttar boıynsha mundaı oqıǵa tótenshe dep baǵalanady.

Osyǵan baılanysty Tájikstannan 6 jasqa deıingi balalardyń Reseıge kelýine ýaqytsha tyıym salynyp otyr. Shekaralardaǵy ótkizý beketterinde atalmysh respýblıkadan kelip jatqan jolaýshylardy sanıtarlyq-karantındik baqylaý sharalary kúsheıtilýde.

Sońǵy málimetter boıynsha, Tájikstanda polıomelıttiń 280-nen astam oqıǵasy tirkelgen, onyń ishinde 13 oqıǵa kisi ólimimen aıaqtalǵan.

Budan buryn habarlaǵanymyzdaı, Reseıdiń sanıtarlyq qyzmetine Tájikstannan ákelingen jańǵaqtar men keptirilgen jemisterdi dúkender men bazarlardan satylymnan alyp tastaý týraly tapsyrma berilgen bolatyn. Qaterli ınfektsııalyq aýrý bolyp tabylatyn - polıomelıt oshaǵynyń Tájikstanda tirkelýine baılanysty osyndaı qatań shara qabyldanǵan edi. «Rospotrebnadzor» agenttiginiń basshysy Gennadıı Onışenko sondaı-aq tájik keptirilgen jemis-jıdekterge berilgen sanıtarlyq-epıdemıologııalyq qujattardyń kúshin ýaqytsha toqtata turýdy tapsyrdy.

«Qyzý saýda-sattyqty eskersek, bizdiń elimizge «jabaıy» polıovırýstyń kelý, onyń ishinde azyq-túlik ónimderimen kelý qaýpi joq emes. Ásirese, esh óńdeýsiz tamaqqa paıdalanylatyn keptirilgen jemister men jańǵaqtar erekshe qaýipti», - delingen resmı qujatta.