Reseıde pırotehnıka óndiretin kásiporyndaǵy órtten 13 adam qaza tapty
ASTANA. KAZINFORM – Reseıdiń ıAroslavl oblysynda pırotehnıka óndiretin kásiporynda bolǵan órtten 13 adam qaza tapty, dep habarlaıdy TASS.
Kýbrınsk aýylyndaǵy petarda óndiretin kásiporynda órt shyqqan. Tótenshe jaǵdaı saldarynan jaqyn mańdaǵy toǵyz kóppáterli turǵyn úıge zaqym kelgen.
Jedel qyzmet ókilderiniń agenttikke habarlaýynsha, negizinen ǵımarattardyń áınekteri synǵan, taǵy bir úıdiń shatyry zaqymdanǵan.
TASS málimetinshe, buǵan deıin kásiporynda elektr symdaryna qatysty zań buzý anyqtalǵan. ıAroslavl oblysy boıynsha Reseı Tótenshe jaǵdaılar mınıstrliginiń bas basqarmasy óndiristi sońǵy ret 2024 jylǵy 26 qarashada teksergen. Sol kezde ınspektor oqshaýlaǵysh qabatynyń zaqymdanǵan elektr symdaryna baılanysty eskertý jasaǵan.
Kásiporyn eleýli táýekel sanatyna jatady. Reseı zańnamasyna sáıkes, mundaı nysandarǵa josparly tekserý úsh jylda bir retten jıi júrgizilmeýi múmkin.
Óndiris tıesili kompanııa 2025 jyly Mıneralnye Vody qalasynda tirkelgen. Ashyq derekkózderdegi málimetke sáıkes, onyń negizgi qyzmet túri – ónerkásiptik hımıkattardy kóterme saýdada satý.
Buǵan deıin ıAkýtııadaǵy Elga kómir ken ornyndaǵy rezervtik sorǵy stantsııasynda dánekerleý jumystary kezinde jarylys bolǵan edi.
