Reseıde pasterellezdiń taralýy: Qazaqstan baqylaýdy sharalaryn kúsheıtti

ASTANA. KAZINFORM — Reseıdiń birqatar óńirinde epızootııalyq jaǵdaı nasharlap jatyr. Osy oraıda Qazaqstan veterınarlyq qadaǵalaý sharalaryn kúsheıtti. 

Aýyl sharýashylyǵy mınıstrligi baspasóz qyzmetiniń málimetine qaraǵanda, bul sheshim Reseı Federatsııasynyń jekelegen aımaqtaryndaǵy kúrdeli epızootııalyq jaǵdaıǵa baılanysty qabyldandy.

— Qazaqstan Respýblıkasynda epızootııalyq qaýipsizdikti qamtamasyz etý jáne janýarlardyń asa qaýipti aýrýlarynyń paıda bolýyna jol bermeý maqsatynda QR Aýyl sharýashylyǵy mınıstrliginiń Veterınarııalyq baqylaý jáne qadaǵalaý komıteti kórshi elden tiri maldy tasymaldaýǵa, sondaı-aq termııalyq óńdeýden ótpegen et ónimderin, jemdi ákelýge jáne tranzıtteýge ýaqytsha shekteýlerdi birtindep engizdi, — delingen mınıstrliktiń Kazinform agenttigine bergen aqparatynda.

Atap aıtqanda, qazirgi kezde veterınarlyq baqylaý beketteri kúsheıtilgen rejımde jumys istep jatyr. Sondyqtan tasymaldanatyn taýarlardy qatań baqylaý jáne tekserý, kólikterdi dezınfektsııalaý júzege asyrylady. Eger talaptardy buzý derekteri anyqtalsa, ımportty boldyrmaý úshin dereý sharalar qabyldanady jáne taýarlar qaıtarylady.

— Bul rette epızootııalyq jaǵdaı turaqty baqylaýda tur, — dep naqtylady mınıstrlik.

Eske salsaq, bıyl aqpan aıynda Veterınarııalyq baqylaý jáne qadaǵalaý komıteti tóraǵasy Qazbek Tashımov Reseıdiń birqatar óńirinen mal men et jetkizýge engizilgen tyıymnyń sebebin atady.

Reseı Federatsııasynda pasterellez anyqtalǵannan keıin, osyndaı shekteý engizý týraly sheshim qabyldandy