Reseıde ózin bankrot dep jarııalaıtyndar kóbeıdi

MÁSKEÝ. KAZINFORM - Reseıde bankrottyq rásimi tanymal bola bastady, sot arqyly bankrot bolǵandardyń basym kópshiligi buǵan óz erkimen barady, dep habarlaıdy Kazinform agenttiginiń tilshisi «Kommersant» basylymyna silteme jasap.

Belgili bolǵandaı, 2025 jyldyń alǵashqy jarty jylynda 259,8 myń reseılik sot arqyly bankrot dep tanylǵan. Bul ótken jyldyń osyndaı kezeńimen salystyrǵanda 35,7%-ǵa kóp.

Kóp jaǵdaıda (97%) azamattar ózderi sotqa bankrot dep taný týraly ótinish beredi. Al nesıe berýshiler azamattardy tólemge qabiletsiz dep tanýdy sottan 2,1% jaǵdaıda surasa, Reseı Federaldyq salyq qyzmeti – 0,6% jaǵdaıda ǵana ótinish bildiredi.

Sot protsesi aıasynda azamattardyń qaryzdaryn qaıta qurylymdaý jospary da kóbeıip jatyr. Bul jospar boryshty óteýdi keıinge qaldyrý men bólip tóleýdi kózdeıdi. Eger qaryzdy óteý kestesi saqtalsa, boryshker bankrot dep tanylmaıdy.

Alty aıdyń ishinde arbıtrajdyq sottar 1152 qaıta qurylymdaý josparyn bekitti. Bul 2024 jyldyń birinshi jarty jyldyǵymen salystyrǵanda 2,3 ese kóp.

Zańdy tulǵalardyń qyzmeti týraly málimetterdiń Biryńǵaı federaldyq tiziliminiń (Fedresýrs) basshysy A.ıÝhnınniń aıtýynsha, qaryzdy qaıta qurylymdaý josparyn, tipti nesıe berýshilerdiń kelisiminsiz de sot arqyly bekitý tetigin qoldaný Joǵarǵy sottyń jańa túsiniktemelerinen keıin jıileı túsken.

Osy jyldyń ekinshi toqsanynda azamattardyń bergen ótinishteri negizinde 15,9 myń sottan tys bankrottyq rásimi bastalǵan. Bul ótken jylmen salystyrǵanda 25,5%-ǵa kóp. Reseı Federatsııasy Ekonomıka mınıstriniń birinshi orynbasary M.Kolesnıkovtiń aıtýynsha, azamattar úshin tegin sottan tys bankrottyq rásimi qıyn qarjylyq jaǵdaıda «naqty kómek» kórsetip otyr.

Aıta keteıik, Qazaqstanda azamattar úshin sottan tys bankrottyq rásimi jeńildetilgen bolatyn.