Reseıde otbasymen keletin eńbek mıgranttarynyń salyq tólemi ósedi
MÁSKEÝ. KAZINFORM — 2027 jylǵy 1 qańtardan bastap Reseıde asyraýyndaǵy otbasy músheleri el aýmaǵynda turatyn sheteldik jumysshylardyń jeke tabys salyǵy (JTS) boıynsha tirkelgen avanstyq tólemderi ulǵaıady. Bul týraly Reseı Іshki ister mınıstrliginiń basshysy Vladımır Kolokoltsev Federatsııa Keńesindegi Úkimet saǵaty barysynda málimdedi, dep habarlaıdy agenttik tilshisi.
Mınıstrdiń aıtýynsha, vedomstvo eńbek mıgranttarynyń Reseıge jumys istemeıtin týystaryn alyp kelý múmkindigin qarjylyq turǵydan shekteıtin zań qabyldaýǵa bastamashylyq jasaǵan. 2027 jyldan bastap elge birge keletin otbasynyń árbir múshesine qosymsha salyq salynady.
Kolokoltsevtiń sózinshe, bul shara áleýmettik salaǵa túsetin júktemeni azaıtýǵa baǵyttalǵan. Ol Reseıde turatyn jáne memlekettik qyzmetterdi paıdalanatyn shetel azamattary salyq tóleý arqyly osy shyǵyndardy qarjylandyrýǵa qatysýǵa tıis ekenin atap ótti.
Bul rette týystardyń elge kelýi úshin jeke alym engizý emes, JTS boıynsha tirkelgen avanstyq tólemdi ulǵaıtý kózdelip otyr. 2026 jylǵy 26 shildedegi № 242-FZ Federaldyq zańǵa sáıkes, Reseıde turatyn asyraýyndaǵy árbir kámeletke tolmaǵan bala úshin tólem mólsheri 50% artady. Al sheteldik jumysshylardyń jekelegen sanattary úshin qosymsha tólem otbasynyń basqa múshelerine de qatysty qoldanylady. Eger asyraýyndaǵy adam birneshe shetel azamatynyń qamqorlyǵynda bolsa, qosymsha tólem olardyń tańdaýy boıynsha bireýine ǵana esepteledi.
Kolokoltsev 2025 jyldan beri eńbek mıgranttary otbasyndaǵy jumys istemeıtin jáne oqymaıtyn músheler sany 20% qysqarǵanyn da habarlady.
Reseı ІІM dereginshe, 2026 jyldyń alǵashqy toǵyz aıynda elge shamamen 7 mln shetel azamaty kirgen. Bul byltyrǵy osy kezeńmen salystyrǵanda 10%-ǵa jýyq az. 1 qazandaǵy jaǵdaı boıynsha Reseıde shamamen 6 mln mıgrant bolǵan. Olardyń arasynda zańdy túrde jumysqa ornalasqandardyń úlesi 45%-dan 50%-ǵa deıin ósken.
Eske salaıyq, buǵan deıin Reseıdiń búkil aýmaǵynda mıgranttardy baqylaýdyń jańa júıesi engiziletinin habarlaǵanbyz.
