Reseıde órt saldarynan 100-ge jýyq ǵımarat búlinip, bir adam qaza tapty

MÁSKEÝ. QazAqparat - Reseıdiń Sverdlov oblysyndaǵy Sosva kentinde órtengen ǵımarattar sany 100-ge jýyqtady, dep habarlaıdy QazAqparat TASS aqparat agenttigine silteme jasap.

«Seısenbi kúni kúndiz bolǵan órt saldarynan 92 ǵımaratqa zaqym keldi. Órt sóndirý jáne úıindilerdi ashý kezinde bir adamnyń denesi tabyldy», - dep habarlady RF Tótenshe jaǵdaılar mınıstrliginen.

Kentte ornalasqan emdeý-túzeý mekemesinen (LIÝ-23) 240 sottalýshy evakýatsııalandy.

Jalynnyń tez taralýyna qurǵaq ósimdikter men ekpini 20 m/s bolǵan jel sebep bolǵan. Sý kózderi aýyldan shalǵaıda ornalasqan.

«Qutqarýshylar órt sóndirý ornyn sýmen qamtamasyz etý úshin Sosva ózeninen jalpy uzyndyǵy 2 shaqyrym bolatyn magıstraldyq jelilerdi tartty», - dep tolyqtyrdy vedomstvodan.

Órtti sóndirýge 120 adam men 33 tehnıka, onyń ishinde 2 órt sóndirý poıyzy tartyldy, Sonymen qatar Reseı Tótenshe jaǵdaılar mınıstrligi men Ulttyq ulannyń tikushaǵy jumyldyrylǵan.