Reseıde oqıtyn qazaqstandyq stýdent óz erkimen ChVK Vagnermen kelisimshartqa otyrǵan - SІM

ASTANA. QazAqparat – Reseıde bilim alyp jatqan qazaqstandyq stýdent óz erkimen jeke áskerı kompanııamen kelisimshartqa otyrǵan. Búginde aqpardyń qanshalyqty ras ekeni anyqtalyp jatyr. Bul týraly Syrtqy ister mınıstrliginiń resmı ókili Aıbek Smadııarov málim etti, dep habarlaıdy QazAqparat tilshisi.

«Qolda bar málimetke sáıkes, atalǵan Qazaqstan azamaty ChVK Vagner (reseılik memlekettik emes qarýly qurylym) jeke áskerı kompanııasymen óz erkimen kelisimshartqa otyrǵan. Máskeýdegi Qazaqstan Respýblıkasynyń elshiligi jas jigittiń týystarynyń ótinishi boıynsha Reseı Federatsııasynyń quzyretti organdaryna saýal joldady. Aqparat tekserilip jatyr. Konsýl stýdenttiń týystarymen turaqty baılanysta», - dedi Aıbek Smadııarov.

Eske salsaq, buǵan deıin BAQ betteri men áleýmettik jelilerde Reseıdiń Tomby memlekettik ýnıversıtetinde oqyp jatqan 23 jasar qazaqstandyq stýdenttiń iz-tússiz ketkeni jaıly aqparat taraǵan edi.

Jerlesimizdi ChVK Vagner (reseılik memlekettik emes qarýly qurylym) jeke áskerı kompanııasy quramyna májbúrlep kirgizdi degen boljam da aıtyldy.