Reseıde mıgranttarǵa arnalǵan memlekettik baj birneshe ese ósýi múmkin
MÁSKEÝ. KAZINFORM — Reseıdiń Memlekettik dýmasyna mıgranttar úshin baj salyǵyn birneshe ese arttyrý týraly zań jobasy engiziledi, dep habarlaıdy agenttiktiń Máskeýdegi menshikti tilshisi.
Memlekettik dýmanyń tóraǵasy Vıacheslav Volodın úkimet tómengi palataǵa mıgranttar úshin salyqtyq bajdardy aıtarlyqtaı arttyrýdy kózdeıtin zań jobasyn engizýge daıyndalyp jatqanyn habarlady. Bul týraly ol áleýmettik jelidegi paraqshasynda jazdy.
Habarlamada Reseı úkimetinen kelesi baj mólsherlerin arttyrýdy usynatyn zań jobasyn engizý kútilip otyrǵany aıtylǵan:
- Reseı azamattyǵyn qabyldaý úshin — 12 ese, 4200 rýblden 50 000 rýblge deıin;
- ýaqytsha turýǵa ruqsat berý úshin — 8 ese, 1920 rýblden 15 000 rýblge deıin;
- turaqty turýǵa ruqsat (yqtııarhat) berý úshin — 5 ese, 6000 rýblden 30 000 rýblge deıin.
Sondaı-aq mıgranttar úshin basqa da birqatar salyqtyq bajdy edáýir arttyrý josparlanyp otyr.
V. Volodın zań jobasy Memlekettik dýmaǵa túskennen keıin basymdyq tártibimen qaralatynyn atap ótti.
Memlekettik dýma tóraǵasynyń pikirinshe, bul sharalardyń barlyǵy kóshi-qon salasynda tártipti odan ári nyǵaıtýǵa yqpal etýi tıis.
Budan buryn Reseı Qazaqstan júrgizýshilerine 180 kúndik rejım engizgenin jazǵanbyz.
