Reseıde mıgranttar úshin jańa memlekettik baj salyǵy engiziledi
ASTANA. KAZINFORM — Reseı prezıdenti Vladımır Pýtın zańǵa qol qoıdy, oǵan sáıkes 2025 jyldyń 1 qyrkúıeginen bastap mıgranttar úshin jańa memlekettik baj salyǵy engizilip, burynǵylary ulǵaıtylady, dep habarlaıdy Kazinform.
Reseıge aqsha tabý maqsatynda kelgen sheteldikter patentti berý nemese qaıta rásimdeý, sondaı-aq jumys isteýge ruqsattyń merzimin uzartý úshin 4200 rýbl (shamamen 28 myń teńge) salyq tóleýge mindetti bolady.
Sonymen qatar, 1 qyrkúıekten bastap sheteldik azamatty turǵylyqty jeri boıynsha tirkeý úshin alynatyn memlekettik baj salyǵy 1000 rýblge deıin (shamamen 6700 teńge) kóteriledi, al turǵylyqty orny boıynsha tirkeý úshin memlekettik baj salyǵy 500 rýbl (shamamen 3300 teńge). Elde ýaqytsha bolý merzimin uzartý úshin 1000 rýbl (shamamen 6700 teńge) baj salyǵy qarastyrylǵan.
Bul sharalar sheteldikterdiń Reseıde bolýyn baqylaýdy kúsheıtýge kómektesedi, sondaı-aq memlekettik organdarǵa patentti tirkeýge jáne berýge baılanysty naqty shyǵyndardy óteýge múmkindik beredi.
Budan bólek, bılik memlekettik baj salyǵyn jańartý mıgranttardy qujattar men olardyń jaramdylyq merzimderine jaýapkershilikti arttyrýǵa ıtermeleıdi dep kútip otyr.
Buǵan deıin Reseıdiń Eńbek mınıstrligi zań jobasyna túzetýler engizgenin jazǵan bolatynbyz. Oǵan sáıkes júrgizýshi, satýshy jáne medıtsına qyzmetkeri laýazymdaryna qabyldanatyn mıgranttar orys tili men orys tarıhyn bilý boıynsha test tapsyrý talabynan bosatylmaıdy.