Reseıde meteorıtti zańsyz alyp shyǵý áreketi toqtatyldy
MÁSKEÝ. Kazinform - Sankt-Peterbýrg portynda salmaǵy 2,5 tonna bolatyn meteorıt fragmentin kontrabandalyq jolmen alyp shyǵý áreketi áshkerelendi. Bul týraly Baltyq kedeniniń baspasóz qyzmeti habarlady.
Habarlamaǵa sáıkes, júk Reseıge Eýrazııalyq ekonomıkalyq odaq elderiniń birinen ákelingen. Al ony shetelge shyǵarý kezinde landshaftyq dızaınǵa arnalǵan músin retinde deklaratsııalanǵan. Alaıda egjeı-tegjeıli tekserý barysynda júktiń shyǵý tegi men quny ilespe qujattarda kórsetilgen málimetterge sáıkes kelmeıtini belgili boldy.
Saraptama nátıjesinde onyń sırek kezdesetin «Aletaı» temir meteorıtiniń synyǵy ekeni anyqtaldy. Mamandardyń baǵalaýynsha, onyń jalpy quny shamamen 323 mln rýbl. Kontrabandalyq júk jalǵan syltaýmen Ulybrıtanııaǵa jóneltilmek bolǵan.
«Aletaı» meteorıti 1898 jyly QHR-dyń Shyńjań-Uıǵyr avtonomııalyq aýdanynda tabylǵan. Ol kóne protoplanetanyń ıadrosynyń bir bóligi bolyp sanalady. Bul — Jer betinde belgili eń iri temir meteorıt, erekshe metall jolaqtary bir-birimen órilgen qaıtalanbas qurylymymen erekshelenedi. Negizinen temir men nıkelden turady. Onyń iri fragmentteri joǵary ǵylymı jáne kollektsııalyq qundylyqqa ıe. Sondyqtan meteorıttiń bólikteri jıi zańsyz saýdanyń nysanyna aınalady.
Aıta keteıik, Túrkııada qulaǵan meteorıt áleýmettik jelini dúrliktirdi.