Reseıde memlekettik qyzmetshiler men zań shyǵarýshylardyń tabysyna baqylaý kúsheıtilip jatyr

MÁSKEÝ.KAZINFORM - Reseı Memlekettik Dýmasy birqatar zań jobasyn qabyldady. Oǵan sáıkes, elde memlekettik qyzmetshiler men zań shyǵarýshylardyń tabysy, shyǵysy jáne múlkine baqylaý endi turaqty túrde júzege asyrylatyn bolady, dep habarlaıdy Kazinform agenttiginiń menshikti tilshisi.

Jańa normalar 2026 jylǵy 1 qańtardan bastap kúshine enedi. Osylaısha, jańa erejelerge sáıkes atalǵan sanattaǵy tulǵalardyń materıaldyq jaǵdaıy turaqty negizde baqylaýda bolady.

Zań jobasy memlekettik qyzmetshilerdi jyl saıyn tabys deklaratsııasyn tapsyrý mindetinen bosatady. Laýazymdy tulǵalardyń aqshalaı qarajaty men ózge de múlkin baqylaý úzdiksiz júrgiziletin bolady.

Qazirgi zamanǵy tsıfrlyq múmkindikter tolyq aqparatty úzdiksiz rejımde alýǵa jol ashady. Barlyq málimet memlekettik aqparattyq júıe (MAJ) – «Poseıdon» arqyly taldana alady (ol RF prezıdentiniń 2022 jylǵy jarlyǵymen engizilgen). Bul qoldanystaǵy jyl saıynǵy baqylaý júıesinen bas tartýǵa múmkindik beredi.

Mindetti deklaratsııalaý naqty negizder týyndaǵan jaǵdaıda saqtalady. Atap aıtqanda, eger laýazymdy tulǵa, onyń jubaıy jáne kámeletke tolmaǵan balalarynyń (zańdaǵy jańalyq – balalar tabysyn otbasynyń jalpy tabysyna qosý) úsh jyldyq jıyntyq tabysynan asatyn somaǵa mámile jasalsa. Sonymen qatar memlekettik qyzmetke qabyldanǵanda, bir bılik organynan ekinshisine aýysqanda nemese federaldyq kadrlyq rezervke engizilgen kezde de deklaratsııa tapsyrý talap etiledi.

Buǵan deıin Reseı halyqaralyq qońyraýlarǵa tyıym salýdy josparlap otyrǵanyn jazǵan edik.