Reseıde Memlekettik dýma saılaýynda úsh kúndik daýys berý bastaldy
MÁSKEÝ. KAZINFORM — 18-20 qyrkúıek aralyǵynda Reseı Memlekettik dýmasynyń toǵyzynshy shaqyrylym depýtattaryn, 39 óńirdiń zań shyǵarý jınalystary depýtattaryn, sondaı-aq Reseı sýbektileriniń joǵary laýazymdy tulǵalaryn saılaý ótedi, dep habarlaıdy agenttikniń menshikti tilshisi.
Reseılikter Memlekettik dýmanyń 450 depýtattaryn saılaıdy. Onyń jartysy partııalyq tizim boıynsha, qalǵan jartysy birmandatty saılaý okrýgteri arqyly saılanady.
Federaldyq saılaý okrýgi boıynsha saılaý bıýlletenine 10 partııa engizildi. Olar: «Birtutas Reseı», Reseı Federatsııasynyń Kommýnıstik partııasy (KPRF), LDPR, «Jańa adamdar», «Ádiletti Reseı», «Reseı zeınetkerler partııasy — áleýmettik ádilettilik úshin», «Reseı kommýnısteri», «Rodına», Reseıdiń «Jasyldar» ekologııalyq partııasy jáne Tikeleı demokratııa partııasy.
Memlekettik dýma depýtattarynan bólek, segiz óńirde joǵary laýazymdy tulǵalar saılanady. Sondaı-aq birqatar óńirde zań shyǵarý jınalystary depýtattary men mýnıtsıpaldyq ókildi organdar músheleriniń saılaýy ótedi.
Alǵashqy saılaý ýchaskeleri Kamchatka men Chýkotkada ashyldy. Daýys berý 20 qyrkúıekke deıin jalǵasady. Óńirlerdegi saılaý ýchaskeleri jergilikti ýaqyt boıynsha saǵat 20:00–ge deıin jumys isteıdi.
Merziminen buryn daýys berý 30 tamyzda 37 óńirde bastalǵan bolatyn. Reseı Ortalyq saılaý komıssııasynyń 16 qyrkúıektegi málimetinshe, elde 203 952 saılaýshy aldyn ala daýys bergen.
Shetelde 28 elde shamamen 14 myń Reseı azamaty merziminen buryn daýys berdi. Osylaısha, negizgi daýys berý bastalǵanǵa deıin Reseıde jáne shetelde 217 myńnan astam saılaýshy óz tańdaýyn jasady.
Aıta keteıik, Reseı Memlekettik dýmasynyń buǵan deıingi saılaýy 2021 jyly ótken.
Eske salaıyq, buǵan deıin Serbııada 25 qazanda kezekten tys parlament saılaýy ótetinin habarlaǵanbyz.
