Reseıde memleketke opasyzdyq jasady dep sottalǵandar sany kúrt ósti

MÁSKEÝ. KAZINFORM – Byltyr Reseıde memleketke qarsy qylmys pen tyńshylyq jasaǵany úshin 170-ke jýyq adam sottaldy. Sondaı-aq sheteldermen jasyryn yntymaqtastyq jasady dep aıyptalǵandardyń sany 10 esege ósken. Bul týraly Sot departamentiniń aqparatyna súıene otyryp, «Vajnye ıstorıı» habarlady. 

Reseıde 2024 jyly memleketke opasyzdyq jasaǵany úshin 145 adam sottaldy (RF Qylmystyq kodeksiniń 275-baby).

Bul 2023 jylǵy kórsetkishterden tórt ese kóp jáne qazirgi Reseı tarıhyndaǵy barlyq kórsetkishten joǵary ekeni atap ótildi. 

Bir jyl ishinde sottar 23 reseılikti tyńshylyq jasaǵany úshin túrme jazasyna kesti (Qylmystyq kodekstiń 276-baby) — 2023 jylmen salystyrǵanda 2,5 ese kóp. Eger joǵaryda atalǵan eki bap boıynsha sottalǵandar sany qosylsa, Reseı sottary ótken jyly «memleketke opasyzdyq jasady» degen aıyppen kúnara bir adamdy túrmege kesti. 

Sheteldik memlekettermen jasyryn yntymaqtastyq jasaǵany úshin sottalǵandardyń sany 10 esege ósti. 2024 jyly osy bap boıynsha 21 reseılik kináli dep tanyldy. Bul baptyń ózi Reseı Ýkraınaǵa áskerı operatsııalardy bastaǵannan keıin Qylmystyq kodekske engizilgen. 

Sondaı-aq memlekettik qupııaǵa qatysty baptar boıynsha sottalǵandar da sany artty. Ótken jyly atalǵan aıyppen 209 adam sottaldy, bul 2024 jylmen salystyrǵanda 30 paıyzǵa artyq. 

RTVI jarııalaǵan statıstıkaǵa sáıkes, byltyr kem degende 28 adam tyńshylyq jasaǵany úshin sottalǵan. Onyń 18-i Ýkraına, 7-eýi Reseı, 2-eýi AQSh azamaty.

Eske sala keteıik, Zelenskıı Reseımen áskerı tutqyndar almasqanyn rastady.