Reseıde Max messendjeri mindetti bolady

MÁSKEÝ.KAZINFORM - Reseılik Max messendjeri elektrondy qurylǵylarǵa aldyn ala ornatylatyn mindetti qosymsha bolmaq. Tıisti qaýlyǵa RF Úkimetiniń basshysy qol qoıdy, dep habarlaıdy agenttik tilshisi Reseı Úkimetiniń baspasóz qyzmetine silteme jasap.

Max 2023 jyldan beri qoldanylyp kelgen VK Messenger-diń ornyn basady. Jańa qosymshaǵa qatysty Ereje bıylǵy jyldyń 1 qyrkúıeginen bastap kúshine enedi.

Habarlamada aıtylǵandaı, osy jyldyń 1 qyrkúıeginen bastap reseılik RuStore qosymshalar dúkeni iOS jáne HyperOS operatsııalyq júıelerin qoldanatyn qurylǵylarǵa aldyn ala ornatylýy mindetti bolady.

Sonymen qatar, RF Úkimeti 2026 jyly elektrondy qurylǵylarǵa aldyn ala ornatylýǵa tıis baǵdarlamalardyń tizimin bekitti. Atap aıtqanda, kelesi jyldyń 1 qańtarynan bastap sandyq basqarý blogy bar teledıdarlarǵa Lime HD TV ornatylady.

Aıta keteıik, buǵan deıin reseılik Max messendjerinde 18 mln. paıdalanýshy tirkelgeni habarlanǵan edi.