Reseıde Máskeýdegi qazaq dıasporasynyń jetekshisine qatysty qylmystyq is qozǵaldy
Reseıdiń Tergeý komıteti qoǵam belsendisi, Máskeýdegi qazaq dıasporasynyń múshesi Polat Jamalovqa qatysty qylmystyq is qozǵady, dep habarlaıdy Kazinform tilshisi.
Reseıdiń «Verstka» telegram-arnasynyń habarlaýynsha, bul týraly Tergeý komıtetiniń jabyq esebine arnalǵan aqparattyq anyqtamada aıtylǵan. 2023 jyldyń 11 qyrkúıeginde Máskeý qalasynyń soltústik-shyǵys ákimshilik okrýginiń asa mańyzdy isterdi tergeý bóliminiń tergeýshisi Reseı Federatsııasy Qylmystyq kodeksiniń 207.3-babynyń 1-bóligi (Reseı Federatsııasynyń Qarýly kúshterin paıdalaný týraly jalǵan aqparatty jarııa etý) boıynsha qylmystyq is qozǵady.
Qylmystyq istiń qozǵalýyna Polat Jamalovtyń Facebook áleýmettik jelisindegi paraqshasyndaǵy habarlama sebep boldy, onda avtor Reseı Federatsııasynyń Qarjy mınıstrligi basshylyǵynyń RF Qarýly kúshteriniń arnaıy áskerı operatsııasy kezinde qaza tapqandar sanyn baǵalaýyna qysqasha túsinikteme bergen.
Polat Jamalov Máskeýdegi qazaq dıasporasynyń bedeldi aqsaqaldarynyń biri retinde tanymal. Ol otyz jyldan astam ýaqyt boıy Reseıdegi qazaq mádenıetin, salt-dástúrin, tilin saqtaý men damytýǵa baǵyttalǵan belsendi qoǵamdyq qyzmetpen aınalysyp keledi. Ótken jyldary Máskeý qazaq ólkelik ulttyq-mádenı avtonomııasynda, Máskeý qazaq dıasporasy qorynda jáne Máskeý ulttar úıinde basshylyq qyzmetterdi atqarǵan. Qazirgi ýaqytta Qazaqtyń etnıkalyq mádenıetin saqtaý jáne damytý kommertsııalyq emes uıymdar odaǵynyń teń tóraǵasy.
RF Qylmystyq kodeksiniń 207.3 babynyń 1 bóligi boıynsha eń az degende jeti júz myń rýbl mólsherinde aıyppul tóleý, eń kóbi bes jylǵa deıin bas bostandyǵynan aıyrý jazasy qarastyrylǵan.
