Reseıde lagerge demalýǵa bara jatqan 56 bala poıyzda ýlanyp, aýrýhanaǵa tústi

KRASNODAR. TASS-QazAqparat - Reseıdiń Krasnodar aımaǵynda «Mýrmansk-Adler» poıyzynda ýlanyp, aýrýhanaǵa túsken bala sany 56-ǵa jetti, dep habarlaıdy QazAqparat TASS agenttigine silteme jasap.

«Apsheron, Týapse jáne Belorechensk aýdandarynda ornalasqan úsh aýrýhanaǵa 56 bala jetkizildi. Barlyq balanyń jaǵdaıy jeńil jáne ortasha. Búkil patsıentterge tıisti medıtsınalyq kómek kórsetildi. Áli eshqaısysy aýrýhanadan shyǵarylǵan joq» dep málim etti agenttikke suhbat bergen aqparat kózi.

Onyń aıtýynsha, óńir dárigerleri oqıǵa boıynsha shuǵyl ári kásibı áreket etti, sonyń arqasynda jaǵdaı ýshyqqan joq.

Soltústik Kavkaz temir jolynyń saıtynda aıtylǵandaı, Mýrmansk-Adler baǵytynda jolǵa shyqqan basqa balalar demalys ornyna jetkizilip, jaıǵastyrylǵan.

«Shamamen 250 bala mingen №226 poıyz kámeletke tolmaǵan jolaýshylardy Týapse qalasynda ornalasqan demalys aımaǵyna apardy. Olardy kólikten túsirgen kezde dárigerler qarap, densaýlyq jaǵdaıyn jan-jaqty tekserdi. Onyń ishinde 36 bala ınfektsııalyq aýrý juqtyrdy degen kúdikpen Týapse aýrýhanasyna jóneltildi» delingen habarlamada.

Qalǵan balalar «Teńiz tolqyny» saýyqtyrý lagerine kelip jetken.

Munyń aldynda TASS agenttigi 20 balanyń Apsheron jáne Belorechensk aýrýhanalaryna jatqyzylǵanyn habarlaǵan edi.

Rospotrebnadzor mamandary poıyzdaǵy tamaq pen sýdan synama aldy. Poıyz sońǵy stansaǵa jolaýshysyz keldi.

Oqys oqıǵa negizinde qylmystyq is qozǵaldy.