Reseıde Labubu oıynshyqtarynan ýly zat tabyldy
MÁSKEÝ.KAZINFORM - «Roskachestvo» sapa men qaýipsizdik talaptaryna sáıkes tekserý júrgizgennen keıin Labubu oıynshyǵynda ýly zattyń shekten asyp ketkenin anyqtady. 13 úlginiń birinde toksıkalyq zattyń normadan joǵary mólsheri tirkelgeni týraly uıymnyń habarlamasynda aıtylǵan, dep jazady agenttik tilshisi.
Ónim 53 sapa jáne qaýipsizdik kórsetkishi boıynsha zertteldi: toksıktik ındeks ólshendi, markırovka, mata men tigis sapasy tekserildi, sondaı-aq gıgıenalyq qaýipsizdikke, onyń ishinde toksıkologııalyq kórsetkishterge baılanysty úsh top test júrgizildi.
Tekserý barysynda mamandar bir oıynshyqtan ruqsat etilgen normadan joǵary (norma — 2 mg/lıtr, anyqtalǵany — 2,9 mg/lıtr) mólsherde dıoktılftalat — densaýlyqqa qaýipti toksıkalyq zat tapty.
Dıoktılftalat qanshalyqty zııandy?
Bul zattyń basty qaýiptiligi — reprodýktıvtik júıege jáne damýǵa ýytty áser etýi. Ol gormonaldy júıeniń jumysyn buzady: áıel jynys gormondarynyń (estrogenderdiń) áreketin ımıtatsııalaıdy nemese buǵattaıdy. Bul ásirese balalar men júkti áıelder úshin qaýipti. Er balalar úshin bul zatpen jıi baılanysta bolý reprodýktıvtik organdardyń damýyna keri áser etýi jáne bolashaqta uryq sapasynyń tómendeý qaýpin týdyrýy múmkin.
Sonymen qatar, dıoktılftalat minez-qulyq pen nevrologııalyq máselelerge (mysaly, SDVG damýyna) yqpal etýi múmkin.
Uzaq ýaqyt áser etken jaǵdaıda baýyr men búırekke ýytty áserin tıgizedi. Sondaı-aq allergııa men teri titirkenýin shaqyrýy múmkin.
Buǵan deıin Avstralııa men Ońtústik Koreıa Labubu oıynshyqtarynyń qaýipti jalǵan nusqalary týraly eskertý jasaǵan edi.