Reseıde kúıshi Dına Nurpeıisovanyń 160 jyldyǵy atalyp ótiledi
Astrahan oblysy gýbernatorynyń baspasóz qyzmetiniń málimetine súıensek, Reseı jerin 15 jylǵa jýyq mekendegen kúı anasynyń 160 jyldyq mereıtoıyn atap ótýdiń arnaıy is-sharalar jospary jasaqtalǵan. Sonyń biri – Dına Nurpeıisovanyń ómiri men óneri jaıly jańa kitaptyń tanystyrylymy.
«Qazaqtyń kúı atasy – Qurmanǵazy Saǵyrbaıulynyń murasyn nasıhattaǵan biregeı shákirti Dına Nurpeıisova 1922-1937 jyldary Astrahan oblysynyń birneshe eldi mekeninde turǵan. Onyń ishinde qazirgi Volodar aýdanynyń Kozlov aýyly da bar. Kúıshi Dına 1934 jyly Marfın aýylynda ótken kórkemónerpazdar baıqaýynda birinshi júldeni ıelengen. Ony aıǵaqtaıtyn qurmet gramotasy saqtalǵan», - deıdi ólketanýshy Asylbek Seıitálıev.
Onyń aıtýynsha, Astrahan oblystyq memlekettik arhıvinen Dına Nurpeıisovanyń otbasy músheleriniń, tipti sıyr men qoıdyń tizimi kórsetilgen qujat tabylǵan. Bul – Marfın aýdanyndaǵy Kozlov aýyldyq keńesiniń arhıv anyqtamasy. Sondaı-aq astrahandyqtar shyǵarǵan «Estelik kitabynda» uly Hajen men nemeresi Qojahmettiń 1941 jyly Ekinshi dúnıejúzilik soǵysta habarsyz ketkeni, al jaýyngerlik ordender men medaldarǵa ıe bolǵan úlken uly Jurynbaıdyń 1946 jyly ómirden ótkeni týraly jazylǵan.
