Reseıde Qurmanǵazy kesenesiniń 20 jyldyǵy atalyp ótiledi
ASTANA. QazAqparat - Reseıdiń Astrahan oblysynda 12 mamyrda ataqty kúıshi Qurmanǵazy Saǵyrbaıuly jerlengen Altynjar aýylynda kúıshini eske alýǵa arnalǵan saltanatty shara ótedi. Bıyl kúıshiniń basyna kesene turǵyzylǵanyna 20 jyl toldy, dep habarlaıdy astrakhan-24.ru.
Sharaǵa Astrahan oblysy men Volodarskıı aýdandyq bilim mekemesiniń basshylyǵy, qoǵam ókilderi, jastar jáne oqýshylar qatysady.
Kúıshi Batys Qazaqstan oblysynyń Jańaqala aýdanyna qarasty Jıdeli degen jerde 1823 jyly dúnıege kelgen. Topyraq buıyrǵan orny - Reseıdiń Astrahan oblysynyń qazirgi «Qurmanǵazy tóbe» dep atalatyn jer.
Qurmanǵazynyń bala kezinen - aq eń aıtkysh tili, eń sezimtal tili qos ishekti dombyra kómeıinen shyǵatyn kúı tili edi.
Qurmanǵazynyń ǵumyr keshken ýaqyty, ásirese oń solyn tanyp, ómir-tirshilikke belsene aralasa bastaǵan kezi meılinshe kúrdeli edi. Bul kezeń patshalyq Reseı júrgizgen otarshyl saıasattyń eń bir qarqyn alǵan, ábden qunyqqan, shekten shyǵa basynǵan kezi bolatyn. Qurmanǵazyny sýretker retinde aıryqsha daralap kórsetetin qasıet - ol kontseptýaldy kúıshi. Bir urpaq emes, eki urpaq emes, birneshe urpaqtyń taǵdyryna yqpal etetin zamanalyq qubylystarǵa boılaı úńilip, oı tolǵaý Qurmanǵazynyń rýhanı bolmysyna tán.
