Reseıde koronavırýsten alǵash ret bir apta ishinde 5 myńnan asa adam qaıtys boldy

MÁSKEÝ. TASS-QazAqparat – Reseıde koronavırýsten kóz jumǵan adamdardyń sany sońǵy jeti kún ishinde 5 077-ge ósti. Bul týraly Reseıdegi Jańa ınfektsııamen kúres jónindegi federaldy jedel shtabtyń derekterine súıenip esep júrgizgen TASS agenttigi málim etti, dep habarlaıdy QazAqparat.

Reseı úshin bul jańa rekord bolyp otyr. Aldyńǵy rekord ótken aptanyń qorytyndysy boıynsha tirkelgen. Ol kezde koronavırýsten 4 643 adam qaıtys bolǵan.

Degenmen ólim sanynyń úlesi juqtyrý jaǵdaılarynyń kóptigine baılanysty qatty ózgeriske ushyramady. Alty kúnniń ishinde ol 2,46%-dan 2,47%-ǵa deıin ǵana kóterildi.

Reseıdegi ólim kórsetkishi ótken jylmen salystyrǵanda edáýir joǵary bolyp otyr: bir aptanyń ishinde elde bolǵan ólim sany 2020 jyldyń shilde aıynyń jıyntyq kórsetkishi (1-31 shilde aralyǵynda shtab 4 643 ólim týraly habarlaǵan) bolǵan. Shtabtyń derekteri tolyq emes jáne tek ólimniń negizgi sebebi koronavırýs bolǵan jaǵdaılardy ǵana qarastyratynyn atap ótý kerek.

Reseıde aýrýdy juqtyrý ósýde, alaıda onyń ósý qarqyny tómendep keledi. 5-11 shilde aralyǵynda elde 172 392 juqtyrý jaǵdaıy anyqtaldy, ótken aptada bul kórsetkish 159 650 (8%-ǵa ósken, ótken aptada ósim 19%-dy kórsetken) bolǵan.

Bul Máskeýdegi ahýaldyń turaqtanǵanymen baılanysty. Onda koronavırýs juqtyrýdyń jańa jaǵdaılary azaıdy. Shtab 41 463 jaǵdaıdy tirkedi, ótken aptada juqtyrǵandar sany 48 833 (15,1%-ǵa tómen) bolǵan.

Elde jazylyp shyqqandar sany 131 318-ge ósti. Bul ótken aptadaǵy kórsetkishten 17,1%-ǵa joǵary. Alaıda belsendi jaǵdaılar sany artýda – elde, shtab, derekteri boıynsha, 440 112 adam em alýda (bul – 5 aqpannan bergi eń joǵary kórsetkish).