Reseıde koronavırýstan qaıtqan naýqastardyń sany 10 myńnan asty
MÁSKEÝ. TASS-QazAqparat - Reseıde koronavırýstan kóz jumǵandar sany 10 myńnan asyp ketti, dep habarlaıdy QazAqparat TASS agenttigine silteme jasap.
Búgin jańa ınfektsııamen kúres jónindegi shuǵyl shtab 10 myń adam koronavırýstan qaıtqanyn, bul - barlyq aýrý juqtyrǵandardyń 1,49 paıyzy ekenin jetkizdi. Bul - álemdegi ortasha kórsetkishten shamamen úsh ese az.
Ótken táýlikte 168 adam indetten kóz jumǵan. Al odan bir kún buryn bul kórsetkish 176 edi. Ósim - shartty túrde 1,7%. Mamyrdyń sońǵy aptasynda jáne maýsymnyń basynda Reseıde aýrý órship turǵanda ósim 3-5% tómendemeı qoıǵan edi.
Shtabtyń málimetinshe, elde koronavırýstan 10 027 adam qaıtys bolǵan. Orta eseppen alǵanda 100 myń reseılikke 7 ólimnen kelip tur. Eýropa elderinde bul kórsetkish áldeqaıda joǵary: bıligi qatań karantın engizýden bas tartqan Shvetsııada 100 myń adamǵa - 54 ólimnen keledi, al Italııa men Ispanııada - 58 jáne 61-den, Ulybrıtanııada - 65-ten keledi.
Áıtse de, shuǵyl shtabtyń málimeti - eń sońǵy qorytyndy aqparat emes. Olar sáýirdegi RF vıtse-premeri Tatıana Golıkova usynǵan naqtylanǵan ólim-jitim statıstıkasyn eskermeıdi. Sondaı-aq Máskeý bıliginiń sáýir men mamyrda qaıtqandar týraly málimetin de eseptemegen.
