Reseıde koronavırýsqa shaldyqqandar sany táýligine rekordty 32 196 adamǵa jetti

MÁSKEÝ. QazAqparat – 15 qazandaǵy jaǵdaı boıynsha Reseıde koronavırýs ınfektsııasynan qaıtys bolǵandar sany 999-ǵa jetti, bul pandemııa bastalǵannan bergi eń joǵary kórsetkish, dep habarlaıdy QazAqparat.

Koronavırýsqa qarsy kúres jónindegi jedel shtabtyń málimetteri boıynsha, sońǵy aıda ólim-jitimniń eń joǵary máni 14 ret jańartyldy, ıaǵnı orta eseppen ár eki kún saıyn kezekti antırekord tirkelip otyrdy.

Resmı derekterge súıensek, sońǵy aıda Reseı Federatsııasynda koronavırýstan 25 478 adam qaıtys boldy, ıaǵnı bul – pandemııa kezinde qaıtys bolǵandardyń jalpy sanynyń 11,51 paıyzy.

DDU jahandyq reıtınginde Reseı sońǵy 7 kúnde koronavırýstan qaıtys bolǵandar sany boıynsha AQSh-tan keıingi 2-orynda jáne pandemııanyń búkil kezeńinde 5-orynda. Sońǵy táýlikte Reseıde koronavırýstyń 32 196 jańa jaǵdaıy anyqtaldy, dep habarlaıdy Rospotrebnadzor saıty. Koronavırýs juqtyrǵandar sany boıynsha kósh bastap turǵandar: Máskeý – 6 631 jaǵdaı, Sankt-Peterbýrg – 2 632 jáne Máskeý oblysy – 2 110 jaǵdaı.

Reseı Federatsııasynda koronavırýstyń 7 926 176 jaǵdaıy anyqtaldy, 6 960 024 naýqas jazylyp shyqty. Pandemııa kezeńinde ınfektsııadan 221 313 adam qaıtys boldy. Al 1 581 572 adam medıtsınalyq baqylaýda. Ótken táýlikte 22 268 adam emdelip shyqty.

Epıdemııalyq jaǵdaıdyń shıelenisýine baılanysty 30-dan astam óńir karantın rejımin qatańdatty, onyń ishinde qoǵamdyq oryndarǵa barý jáne kópshilik is-sharalar úshin QR-kodtar, sondaı-aq vaktsınadan ótkendigi týraly sertıfıkattar engizildi. Jeke sýbektilerde vaktsına alýǵa mindettelgen qyzmetkerler úshin qyzmet salalarynyń tizimi engizildi nemese keńeıtildi.