Reseıde koronavırýsqa qarsy jappaı vaktsına salý qarasha-jeltoqsan aralyǵynda júrgiziledi

Bul týraly dúısenbi kúni jýrnalısterge Reseıdiń Densaýlyq saqtaý mınıstri Mıhaıl Mýrashko Irkýtsk qalasyna sapary barysynda málim etti, dep habarlaıdy QazAqparat reseılik TASS agenttigine silteme jasap.

Agenttiktiń habarlaýynsha, vaktsınany alǵashqylardyń biri bolyp qyrkúıek aıynda táýekel tobyndaǵylar, ıaǵnı dárigerler men muǵalimder alady.

«Táýekel tobyndaǵy azamattarǵa vaktsınıalar qajetti kólemde qyrkúıek aıynan jetkizile bastaıdy. Al jappaı vaktsınatsııalaý qarasha-jeltoqsan aralyǵyna josparlanyp otyr»,-dedi mınıstr.

Onyń sózinshe, preparatty tirkeýden keıingi zertteý jumystary osy aptada bastalady.

«Bul bizge vaktsınany jan-jaqty zertteýge berilgen múmkindik. Biz vaktsınanyń tıimdi ekenin kórip otyrmyz. Soǵan qaramastan biz ony tereń ári jan-jaqty zerttegimiz keledi. Óıtkeni bizge túsetin naýqastardyń árqaısynynyń densaýlyq jaǵdaıy bir-birinen bólek, árqaısynynyń ereksheligi ártúrli»,-dep túsindirdi ol.