Reseıde koronavırýsqa qarsy vaktsınanyń alǵashqy partııasy aınalymǵa shyqty
MÁSKEÝ. TASS – QazAqparat – koronavırýsqa qarsy «Spýtnık V» vaktsınasynyń alǵashqy partııasy azamattyq aınalymǵa shyǵaryldy.
Densaýlyq saqtaý mınıstrligi baspasóz qyzmetiniń aıtýynsha, dári-dármekti jaqyn arada Reseı óńirlerine jetkizý kózdelip otyr, dep habarlaıdy QazAqparat reseılik TASS agenttigine silteme jasap.
«Jańa koronavırýstyq ınfektsııanyń aldyn alýǵa arnalǵan vaktsınanyń alǵashqy partııasy – «Gam-Kovıd-Vak» (Spýtnık V) qajetti sapa synaqtarynan ótip, azamattyq aınalymǵa shyǵaryldy», – delingen habarlamada.
Synaqtar Reseıdiń Densaýlyq saqtaýdy qadaǵalaý qyzmetiniń zerthanalarynda júrgizilgen.
Vaktsınany Gamaleıa atyndaǵy ulttyq epıdemıologııa jáne mıkrobıologııa ǵylymı-zertteý ortalyǵy jasaǵan.
Buǵan deıin Densaýlyq saqtaý mınıstrliginiń basshysy Mıhaıl Mýrashko: «Bul kezeńdegi azamattyq aınalym – táýekel tobyndaǵy turǵyndardy, atap aıtqanda, muǵalimder men dárigerlerdi vaktsınalaý. Ol tirkeýden keıingi klınıkalyq zertteýlermen qatar júrgiziledi», – dep túsindirgen bolatyn.
