Reseıde koronavırýs juqtyrǵan naýqastarǵa arnalǵan tósek-oryndardyń 90%-y bos emes
MÁSKEÝ. QazAqparat – Reseıde koronavırýs ınfektsııasyn juqtyrǵan naýqastarǵa arnalǵan 129 myń tósektiń 90% - ǵa jýyǵy bos emes, dep habarlaıdy QazAqparat TASS agenttine silteme jasap.
«Elimizde jańa koronavırýs ınfektsııasy endi tarala bastaǵan shaqta juqpaly naýqastardy qabyldaýǵa 50 myńǵa jýyq tósek-oryn daıyn boldy. COVID-19 aýrýynyń deńgeıi joǵary bolǵan kezeńde biz olardyń sanyn 184 myń tósekke deıin jedel kóbeıttik. Budan ári aýyrǵandar men aýrýhanaǵa jatqyzylǵandar sany azaıyp, biz negizgi beıin boıynsha patsıentterdi qabyldaý jáne josparly medıtsınalyq kómek kórsetý úshin ınfektsııalyq tósekterdiń bir bóligin rezervke aýystyrdyq. Qazirgi ýaqytta COVID-19 patsıentteri úshin 129 750 tósek bar, olardyń 115 500-i bos emes, bul 89%-dy quraıdy. Aýrýǵa shaldyqqandar sany ósken jaǵdaıda, qosymsha tósekter rezervten aýystyrylady», – dedi Reseı Densaýlyq saqtaý mınıstriniń kómekshisi Alekseı Kýznetsov.
Buǵan deıin Rospotrebnadzor basshysy Anna Popova Reseı Federatsııasynda koronavırýspen aýyratyn naýqastarǵa arnalǵan aýrýhana tósekteriniń shamamen 51% -y bos ekenin aıtqan bolatyn.
Reseıde koronavırýsqa qarsy federaldy jedel shtabtyń málimeti boıynsha 1 159 573 ınfektsııa tirkelgen, 945 920 adam aýrýynan aıyǵyp, 20 385 adam qaıtys boldy. Reseı úkimeti eldegi jaǵdaıdy aqparattandyryp otyrý úshin stopkoronavırýs.rf resýrsyn iske qosty.
