Reseıde kólge qaıyqpen serýenge shyqqan saparda 13 bala sýǵa ketti
ASTANA. QazAqparat - Sońǵy derekter boıynsha Karelııadaǵy kólge qaıyqpen serýenge shyqqandardyń arasynda 13 bala men bir eresek sýǵa ketip qaza tapty, dep habarlaıdy Bı-Bı-Sı agenttigi.
Qazir qutqarýshylar Sıamozero kólindegi izdestirý jumystaryn toqtatty. Al serýenge shyqqandardyń barlyǵynyń qaıda ekendikteri tolyq anyqtaldy.
Bastapqy tergeý barysynda «Park-Otel Sıamozero» saýyqtyrý lagerinde senbi kúni demalýshylar úsh qaıyqpen Sıamozero kóline serýenge shyǵyp daýylǵa urynǵandyǵy anyqtaldy.
Úsh qaıyqta Máskeýden demalýǵa kelgen barlyǵy 12-17 jas aralyǵyndaǵy 47 bala men 4 eresek nusqaýshy bolǵan. Eki qaıyq qatty jelden aýdarylyp qalǵan.
Reseı Tergeý komıteti oqıǵa boıynsha qylmystyq is qozǵady. Qazir sapardy uıymdastyrǵan eki nusqaýshy qamalǵan, olardan jaýap alynýda.
Karelııada jergilikti ákimshilik 20 maýsymdy qaraly kún dep jarııalady.
