Reseıde qolaısyz aýa raıy saldarynan 3 adam qaza tapty, myńdaǵan turǵyn jaryqsyz qaldy
MÁSKEÝ. KAZINFORM — RF Tótenshe jaǵdaılar mınıstrligi habarlaǵandaı, Máskeý qalasy, Máskeý jáne Samara oblystary aýmaqtarynda aýa raıynyń qolaısyzdyǵynan 36 adam zardap shekti, olardyń úsheýi, sonyń ishinde bir bala qaıtys boldy, dep habarlaıdy Kazinform agenttiginiń Máskeýdegi menshikti tilshisi.
Óńirde 2 myńnan astam aǵash qulap, 1 myńnan astam avtokólik zaqymdandy, 70 myńnan astam adam elektr qýatynsyz qaldy.
RF Gıdrometortalyǵynyń habarlaýynsha, Máskeý óńirinde jaýyn-shashyn taǵy bir táýlikke sozylady — sınoptıkter 29 sáýirde jańbyr men qar aralas jaýyn-shashyn kútiletinin boljap otyr.
Reseı astanasyndaǵy aýa raıyna soltústik-shyǵys baǵytta birtindep jyljyp jatqan Baltyq tsıklony áli de áser etedi.
Osyǵan baılanysty búgingi táýlikte qar aralas jańbyr men qar jaýady, al keı jerlerde symdar men aǵashtarǵa jabysqaq qardyń jınalý qaýpi saqtalady. Jeldiń ekpini jekelegen aýdandarda sekýndyna 17 metrge deıin jetýi múmkin.
Osy ýaqytta 28 sáýirde Máskeýde jeldiń ekpini sekýndyna 20 metrge deıin jetip, boran soǵyp, symdar men aǵashtarǵa qar jabysyp, kóktaıǵaq saqtalady. Qala turǵyndaryna aǵashtardyń astyna panalamaýǵa jáne kólikterin olardyń janyna qoımaýǵa keńes berildi.
Máskeýdiń qalalyq qyzmetteri borannyń saldaryn joıýdy jalǵastyryp jatyr.
Budan buryn Máskeýge keıingi 150 jylda bolmaǵan qalyń qar jaýǵanyn jazǵanbyz.
