Reseıde Qıyr Shyǵysta jerdi tegin tarata bastady
ASTANA. QazAqparat - Reseılikterge Qıyr Shyǵystan 1 gektar jerge ıe bolýǵa quqyq beretin zań 1 maýsymnan kúshine endi. Bul múmkindikti birinshi bolyp Qıyr Shyǵys federaldyq okrýginiń turǵyndary paıdalana alady, dep habarlady RBK.
2 mamyrda Reseı prezıdenti Vladımır Pýtın qol qoıǵan «qıyrshyǵystyq gektar» týraly zań 1 maýsymda zańdy kúshine endi. Bul zańǵa sáıkes, Reseı azamaty Qıyr Shyǵystaǵy memlekettik nemese mýnıtsıpaldyq ıeliktegi 1 gektar jerdi tegin ala alady.
Tegin gektardy ıAkýtııa, Kamchatka, Prımore jáne Habarovsk ólkelerinde, Amýr, Magadan jáne Sahalın oblystarynda, Evreı avtonomııalyq oblysynda, sonymen qatar Chýkotkada alýǵa bolady.
Jer ýchaskesin óz betimen nadalnııvostok.rf saıtynan tańdaýǵa bolady. Bul úshin portalda aldyn ala tirkelý kerek.
Ýchaske 5 jyl paıdalanýǵa tegin beriledi. Keıin ony jalǵa alýǵa nemese jeke menshik retinde alýǵa bolady. Jerdi paıdalanbaǵan jaǵdaıda ol qaıtarylyp alynady. Qujatqa sáıkes, sharttaǵy taraptardyń biri sheteldik, azamattyǵy joq nemese kapıtalynda olardyń úlesi nemese sheteldik kompanııalardyń úlesi bar zańdy tulǵa bolǵan jaǵdaıda «qıyrshyǵystyq gektardy» satyp alýǵa-satýǵa jáne jalǵa alýǵa bolmaıdy.
Prımore ólkesiniń gýbernatory Vladımır Mıklýshevskıı atap ótkendeı, 1 maýsymnan Qıyr Shyǵys Federaldyq okrýginiń aýdandarynda ilki joba túrinde júzege asyryla bastaıdy. Ondaǵy jerdi, ázirge, aımaq turǵyndary ǵana ala alady.
«1 qazannan baǵdarlama keńeıtiledi jáne Qıyr Shyǵystyń kez-kelgen turǵyny 1 gektar jerdi kez kelgen sýbekti men mýnıtsıpalıtetten ala alady. Al 2017 jyldyń 1 aqpanynan bul baǵdarlamanyń múmkindigin Reseı Federatsııasynyń barlyq turǵyndary paıdalana alady», - dedi Mıklýshevskıı.
