Reseıde qıraǵan úıdiń úıindilerinen altynshy adamnyń máıiti tabyldy
ASTANA. QazAqparat - Qutqarýshylar Reseıdiń Ijevsk qalasynda qıraǵan úıdiń úıindileriniń arasynan taǵy bir adamnyń máıitin tapty, dep habarlaıdy TASS.
Tótenshe jaǵdaı ornynda jumys istep jatqan jedel shtab alty adamnyń ólgenin rastap otyr.
«Sońǵy málimetter boıynsha alty adam ólip, úsh jasóspirim zardap shekken. Qazir olar aýrýhanada jatyr, jaraqattarynyń aýyrlyǵy ortasha deńgeıde. Úıdiń taǵy eki turǵynynyń qaıda ekeni belgisiz, olardy izdestirý jalǵasýda», - deıdi jedel shtab ókilderi.
Eske sala keteıik, Ijevskidegi toǵyz qabatty turǵyn úılerdiń birinde beısenbi kúni jarylys bolǵan. Aldyn ala málimetterge qaraǵanda, jarylysqa turmystyq gaz sebep bolǵan. Tergeý organdary osy fakti boıynsha qylmystyq is qozǵady.
