Reseıde qymbat kólik satyp alǵandar birjolǵy salyq tóleýi múmkin

ASTANA. KAZINFORM – Reseıde qymbat avtokólikterdi, ıahtalardy jáne áýe kemelerin satyp alýǵa birjolǵy salyq engizý týraly zań jobasy Memlekettik dýma qaraýyna engiziledi, dep habarlaıdy TASS.

Qujatty «Spravedlıvaıa Rossııa» fraktsııasynyń depýtattary ázirlegen. 

Usynylyp otyrǵan ózgerister Reseı Federatsııasynyń Salyq kodeksine engiziledi. Atap aıtqanda, quny 20 mln rýblden asatyn avtokólikterge, sondaı-aq quny 50 mln rýblden joǵary ıahtalarǵa, katerlerge, tikushaqtar men ushaqtarǵa birjolǵy salyq belgileý kózdelgen.

Salyq mólsherlemesi kólik quralynyń baǵasyna qaraı satyp alý qunynyń 1-4 paıyzy aralyǵynda bolady. Paıyzdyq mólsherleme múliktiń baǵalyq sanatyna baılanysty aıqyndalady.

Zań jobasyna sáıkes, salyq memlekettik tirkeý kezinde birjolǵy tártippen tólenýi tıis. Eger kólik quralyn tirkeý talap etilmese nemese tirkeý júrgizilmese, salyq satyp alynǵan kúnnen bastap 30 kúntizbelik kún ishinde tólenýi qajet. Qujatta kórsetilgendeı, salyq tólenbeıinshe kólik quralyn tirkeý múmkin bolmaıdy.

Sonymen qatar qymbat jyljymaıtyn múlikke qatysty saralanǵan salyq mólsherlemesin engizý usynylady. Quny 350 mln rýblden asatyn nysandar úshin mólsherleme 3 paıyz bolýy múmkin.

Quny 450 mln rýblden joǵary múlikke – 3,5 paıyz, al 550 mln rýblden asatyn jyljymaıtyn múlikke 4 paıyz kóleminde belgileý kózdelgen.

Túsindirme jazbada zań jobasyn qabyldaý Reseı Federatsııasy sýbektileriniń jáne jergilikti bıýdjetterdiń kirisin ulǵaıtýǵa múmkindik beretini, sondaı-aq artyq jyljymaıtyn múlik pen asa qymbat jyljymaly múlikti ıelenýdi ońtaılandyrýǵa yntalandyratyny atap ótilgen.

Aıta keteıik, Reseıde qańtar aıyndaǵy jyldyq ınflıatsııa 6 paıyzdy qurady.