Reseıde kıbershabýyldardan kelgen zalal shamasy 1,5 trln rýbl

MÁSKEÝ. KAZINFORN — Reseı bıznesine jasalǵan kıbershabýyl sany ósip keledi. Onyń saldarynan bıylǵy jyldyń 8 aıynda Reseı ekonomıkasyna keltirilýi múmkin boljamdy zalal 1,5 trln rýbl bolýy yqtımal (QR UB 2025 jylǵy 4 qyrkúıektegi baǵamy boıynsha 224 mlrd 550 mln 898 myń teńge). Bul týraly Reseı Sberbankiniń basqarma tóraǵasynyń orynbasary Stanıslav Kýznetsov Shyǵys ekonomıkalyq forýmynda málimdedi, dep habarlaıdy  Kazinform menshikti tilshisi. 

Onyń aıtýynsha, jalpy alǵanda jyl basynan beri Reseıdegi uıymdarǵa qarsy kıbershabýyldar sany úsh ese artqan, al Sberbankke jasalǵan shabýyldar shamamen eki ese ósken.

Baǵalaýǵa sáıkes, mundaı ósim jaǵdaıdy nasharlatý úrdisine ákelip otyr: 8 aıda Reseı ekonomıkasyna keletin shyǵyn shamamen 1,5 trln rýbl bolýy múmkin.

Kóbinese kompanııalarǵa qarsy DDoS-shabýyldar jasalady bul qorǵanys quraldary joq kompanııanyń qyzmetin toqtatýǵa nemese tejeýge múmkindik beredi. Odan kúrdelirek túri ártúrli baǵyttardan kompanııa júıesine zııandy baǵdarlamalyq qamtama engizýge tyrysý.

Baǵalaý boıynsha, keminde 53% kompanııa shabýylǵa ushyraǵan, olar bedeldik táýekelderge de, qarjylyq shyǵyndarǵa da tap boldy.

Buǵan deıin Reseı aýqymdy tehnıkalyq aqaýlarǵa tap bolǵany, TsARKA «Aeroflotqa» jasalǵan kıbershabýylǵa qatysty málimdeme jasaǵany jáne Qazaqstanǵa baǵyttalǵan kıbershabýyldardyń negizgi elderi atalǵany habarlanǵan bolatyn.