Reseıde kıberqylmystarǵa qarsy is-qımyl tujyrymdamasyn iske asyrý jospary bekitildi
MÁSKEÝ.KAZINFORM - RF Úkimeti aqparattyq-kommýnıkatsııalyq tehnologııalardy paıdalaný arqyly jasalatyn qylmystarǵa qarsy is-qımyldyń memlekettik júıesi tujyrymdamasyn iske asyrý jónindegi is-sharalar josparyn bekitti. Bul týraly Reseı Úkimetiniń saıtynda habarlandy, dep jazady agenttik tilshisi.
Habarlamada qujat zańnamany jetildirýdi, qylmyskerlerge tehnıkalyq turǵydan qarsy is-qımyldy jáne halyqtyń tsıfrlyq saýattylyǵyn arttyrýdy kózdeıtin sharalar keshenin qamtıtyny aıtylǵan.
Jospar baǵyttarynyń qatarynda – zańnamany jetildirý jáne vedomstvoaralyq ózara is-qımyldy damytý. Atap aıtqanda, baılanys operatorlary, ınternet-provaıderler, aqparat taratýdy uıymdastyrýshylar jáne basqa da qurylymdar tsıfrlyq tehnologııalardy paıdalaný arqyly jasalatyn qylmystar belgilerin anyqtaǵan kezde quqyq qorǵaý organdaryna habarlaý mindetin belgileý máselesi qarastyrylmaq.
Bul jumysty Reseıdiń ІІM, Tsıfrlyq damý mınıstrligi, Federaldyq qaýipsizdik qyzmeti jáne Roskomnadzor Bas prokýratýra jáne Tergeý komıtetimen birlesip atqarady. Onyń qorytyndysy boıynsha 2027 jyldyń III toqsanynda Reseı Úkimeti qoldanystaǵy zańnamaǵa ózgerister engizý bastamasyn kóterýi múmkin.
Osy merzimge deıin vedomstvolar jeke derekter salasyndaǵy zańnamany buzǵany úshin jaýapkershilikti arttyrý jóninde usynystar engizedi. Atap aıtqanda, mundaı quqyqbuzýshylyqtar boıynsha ákimshilik jaýapkershilikke tartý merzimin uzartý usynylady.
Sonymen qatar ınternet-tehnologııalardy paıdalana otyryp jasalatyn quqyqbuzýshylyqtar men qylmystardyń aldyn alýǵa erekshe kóńil bólingen. Bul is-sharalardy Tsıfrlyq damý mınıstrligi, Mádenıet mınıstrligi, Qarjy mınıstrligi, Ǵylym jáne joǵary bilim mınıstrligi, Bilim mınıstrligi, ІІM jáne Reseı Banki júzege asyrady. Olar azamattardyń tsıfrlyq jáne qarjylyq saýatyn arttyryp, BAQ-ta áleýmettik jarnamany ornalastyrady. Jumystyń jeke baǵyty - kámeletke tolmaǵandardy «tsıfrlyq» qylmystarǵa tartýdyń aldyn alý. Aldyn alý materıaldarynyń depozıtarııi 2026 jyldyń II toqsanynda qalyptastyrylady.
Tsıfrlyq damý mınıstrligi men ІІM 2027 jyldyń I toqsanyna deıin azamattardy yqtımal qylmystar týraly mindetti aqparattandyrý modýlin memlekettik organdarmen ózara is-qımylǵa arnalǵan negizgi mobıldi qosymshalarǵa, sondaı-aq banktik jáne áleýmettik mańyzy bar qosymshalarǵa engizý máselesin pysyqtaıdy.
2026 jyldyń III toqsanynda ınternet-dúkenderdiń resmı saıttaryna siltemelerdiń biryńǵaı tizilimi jasalady. Bul «elektrondyq qosarlanýshylarǵa» qarsy kúres úshin qajet. Budan bólek, 2028 jyldyń I toqsanyna deıin kıberqylmystardy jasaý kezinde jasandy ıntellekt tehnologııalaryn anyqtaý algorıtmi ázirlenedi.
Eske sala keteıik, qylmystarǵa qarsy is-qımyl tujyrymdamasy 2024 jyldyń jeltoqsanynda bekitilgen bolatyn.
Osyǵan deıin reseılik Max messendjerinde 18 mln qoldanýshy tirkelgeni týraly jazdyq.