Reseıde kıberalaıaqtyqqa qarsy sharalardyń ekinshi paketi maquldandy
MÁSKEÝ. KAZINFORM – Reseıdiń Federatsııa Keńesi azamattardy qarjy jáne telekommýnıkatsııa salalaryndaǵy alaıaqtyqtan qorǵaýdy kúsheıtýge baǵyttalǵan kıberalaıaqtyqqa qarsy ekinshi sharalar paketi týraly zańdy maquldady, dep habarlaıdy agenttik tilshisi Federatsııa Keńesiniń saıtyna silteme jasap.
Qujat bank operatsııalary men baılanys qyzmetterine baqylaý jasaýdyń qosymsha tetikterin qarastyrady. Atap aıtqanda, azamattar halyqaralyq kiris qońyraýlarǵa óz erkimen tyıym sala alady. Mundaı qońyraýlardy alaıaqtar jıi zańsyz shemalarda paıdalanady.
Sondaı-aq zań kúmándi operatsııalar kezinde bank kartalaryn paıdalanýǵa shekteýler engizedi. Bul qarjy uıymdary klıentteriniń qaýipsizdigin arttyrýǵa múmkindik beredi.
Jekelegen sharalar blogy kámeletke tolmaǵandardyń qaýipsizdigine arnalǵan. Balalardy alaıaqtardan jáne zııandy kontentten qorǵaý maqsatynda arnaıy «balalarǵa arnalǵan» SIM-kartalardy engizý kózdelgen.
Budan bólek, baılanys qyzmetterin paıdalaný qaǵıdalary kúsheıtiledi. Jańa normalarǵa sáıkes, SIM-karta alǵan sátten bastap 90 kún ishinde baılanys operatorymen jasalǵan shartty buzýǵa bolmaıdy.
Federatsııa Keńesinde sondaı-aq «Memlekettik qyzmetter» portalynda alaıaqtyq áreketterge jedel den qoıýǵa arnalǵan arnaıy servıstiń iske qosylǵanyn eske saldy. «Dabyl túımesi» arqyly paıdalanýshylar alaıaqtyq faktileri týraly ýákiletti organdarǵa jedel habarlaı alady.
Buǵan deıin, 9 maýsymda Reseı Memlekettik dýmasy «Memlekettik qyzmetter» portalynda «qyzyl túıme» servısin qurý týraly zań qabyldaǵan edi. Bul qural azamattarǵa alaıaqtyq belgileri baıqalǵan jaǵdaıda qashyqtan júrgiziletin qarjylyq operatsııalardy jedel toqtatýǵa múmkindik beredi.
Parlamenttiń joǵarǵy palatasynda jańa sharalardyń tıimdiligine turaqty monıtorıng júrgizýdiń mańyzdylyǵy aıtyldy. Senatorlardyń pikirinshe, quqyq qorǵaý jáne baqylaýshy organdar quqyq qoldaný tájirıbesin jedel taldap, kıberqaýipsizdik salasyndaǵy jańa qaterlerge der kezinde jaýap berýi tıis.
Aıta keteıik, buǵan deıin Reseı ınternet keńistiginde jas boıynsha sáıkestendirý júıesin qurýy múmkin ekenin jazdyq.
Sondaı-aq jýyrda Memlekettik dýma mıgranttar úshin baj salyǵyn arttyrý týraly zań qabyldady.
