Reseıde kedeılik sheginen tómen tabysy bar 15,3 mln adam turady

MÁSKEÝ. TASS-QazAqparat – 2022 jyly kedeılik sheginen tómen tabysy bar reseılikter sany 15,3 mıllıon adamdy nemese el halqynyń 10,5% qurady. QazAqparat bul týraly TASS agenttigine silteme jasap habarlaıdy.

Reseı memlekettik statıstıka qyzmetiniń saıtyndaǵy aqparatqa sáıkes, 2021 jylmen salystyrǵanda áleýmettik jaǵdaıy tómen halyq sany 0,7 mıllıon adamǵa – 16 mıllıonnan 15,3 mıllıonǵa deıin azaıdy.

2022 jylǵa kedeılik shegi 13 545 rýbldi (80 745 teńge) qurady.

Statıstıka qyzmetiniń málimetine sáıkes, ótken jyly halyqtyń aqshalaı tabysy 79,1 trln rýbldi qurap, bir jylda 12,2% artqan. Al halyqtyń jan basyna shaqqandaǵy ortasha nomınaldy tabysy 12,4% kóbeıgen. 2022 jyly nomınaldy mánde ortasha aılyq jalaqy 64 191 rýbldi (382 660 teńge) qurap, 2021 jylmen salystyrǵanda 12,6% kóterilgen.

Bul rette, Statıstıka qyzmeti 2022 jyldyń alǵashqy úsh toqsanynda halyqtyń naqty aqshalaı tabysy tómendegenin, tek tórtinshi toqsanda ol azdap kóterilgenin atap ótedi. Jalpy 2022 jyly naqty aqshalaı tabys 2021 jylmen salystyrǵanda 1,4% tómendedi. Al naqty qolda bar aqshalaı tabys 1% azaıdy. Reseı Statıstıka qyzmeti ataǵan sebepter arasynda joǵary ınflıatsııa, sondaı-aq pandemııadan keıin kóptegen salada qalpyna kelý protsesi bastalǵan 2021 jyly tirkelgen joǵary baza effektisi bar.