Reseıde Qazaqstannyń Mádenıet kúnderi ótedi
Mınıstrdiń aıtýynsha, 7 qyrkúıek kúni Reseı astanasy Máskeý qalasyndaǵy Halyq sharýashylyǵy jetistikteriniń kórmesi negizgi sahnasynda saǵat 19:00-de «Astana Balet» teatrynyń qatysýymen mádenıet kúnderiniń saltanatty ashylýy ótedi.
Sondaı-aq Ulttyq mýzeı qoryndaǵy jádigerlerdiń kórmesi uıymdastyrylyp, tanymal opera ánshisi Álibek Dinishev, Qazaqstannyń eńbek sińirgen qaıratkeri Aıgúl Qosanova, «Astana sazy» etno-folkorlyq ansambli, esimderi Reseı jurtshylyǵyna jaqsy tanys jas talanttar Erjan Maksım men Danelııa Tóleshevalar án shyrqaıdy.
- Qazaqstan men Reseı arasyndaǵy mádenı-gýmanıtarlyq qarym-qatynas óte jaqsy damyp keledi. Qazaqstannyń mádenıet kúnderin ótkizýdegi basty maqsatymyz – Reseı jurtshylyǵyn qazaq halqynyń ónerimen, dástúrimen, mádenıetimen tanystyrý. Erteń ashylatyn shara RF Mádenıet mınıstrligi men QR Mádenıet jáne sport mınıstrliginiń 2017-2019 jyldarǵa arnalǵan mádenıet salasyndaǵy yntymaqtastyqty damytý baǵdarlamasy aıasynda ótip jatyr, - dedi baspasóz máslıhatynda QR Mádenıet jáne sport mınıstri Aqtoty Raıymqulova.
Mınıstrliktiń baspasóz qyzmeti taratqan málimetterge qaraǵanda, merekelik baǵdarlamany Qazaq sahnasy juldyzdarynyń kontserti jalǵastyrady.
«Astana balet» teatrynyń solısteri birneshe horeografııalyq kompozıtsııa oryndaıdy. Qazaqstannyń eńbek sińirgen qaıratkeri, «Astana Opera» memlekettik opera jáne balet teatrynyń solısti Nurlan Bekmuhambetov pen «Astana sazy» etno-folklorlyq ansambli tyńdarmandarǵa Lıdııa Rýslanova, Aleksandr Malının, Iosıf Kobzon jáne t.b. ataqty oryndaýshylardyń súıikti shyǵarmalaryn usynady.
Opera sahnasynyń jarqyn jáne qaıtalanbas juldyzy tek Qazaqstannyń ǵana emes, Reseıdiń de ónerdi joǵary baǵalaýshylar arasynda tanymal Saltanat Ahmetova «Uly dala bulbuly» kompozıtsııasyn halyqaralyq konkýrstardyń laýreattary Aızada Kaponova men Anastasııa Kojýharova trıosymen oryndaıdy.
«Golos. Detı-4» (Ýkraına) tele jobasynyń jeńimpazy Danelııa Tóleshova frantsýz ánshisi ZAZdyń «Jevoux» ánin tartý etedi.
Baǵdarlama aıasynda álem moıyndaǵan ánshi Álibek Dinishev Abaıdyń «Kózimniń qarasy» ánin aıtady.
«TheJigits», «ElDivas» shyǵarmashylyq ujymdary, qobyzshylar trıosy men sańlaq dombyrashy, halyqaralyq konkýrstardyń laýreaty Abylaı Tilepbergenov merekelik baǵdarlamanyń kórkin qyzdyrady.
Sondaı-aq, 8-11 qyrkúıek aralyǵynda qazaqstandyq fılmder kórsetilimi bolady.
11 qyrkúıek – Qazaqstannyń Reseıdegi Mádenıet kúnderiniń jabylýynda Ámir Tebenıhınniń (fortepıano) jáne «Fortetrio» memlekettik trıosynyń kontserti P. I. Chaıkovskıı atyndaǵy konservatorııanyń kishi zalynda ótedi.
Aıta keteıik, Ámir Tebenıhın-kóptegen halyqaralyq marapattardyń ıegeri jáne álemniń basty kontsert zaldarynda: Karnegı-Holl (Nıý-Iork), Máskeý konservatorııasynyń Úlken zaly, Vıgmor-Holl (London), Pleıel jáne Korto zaldarynda (Parıj) jıi óner kórsetýshi. Qazaqstannyń Reseıdegi Mádenıet kúnderin jaba otyryp, Ámir N. Meńdiǵalıevtiń «Dombyra týraly ańyz» jáne F. Lısttiń «Sonata sı-mınor» kompozıtsııasyn oryndaıdy.
«ForteTrio» memlekettik trıosy tek Qazaqstanda ǵana emes, odan tys jerlerde de tanymal kameralyq-aspaptyq ansamblderdiń biri. «ForteTrio» qazaqstandyq ónerdi álemniń eń bedeldi sahnalarynda pash etip júr, kóptegen halyqaralyq mýzykalyq festıvaldarǵa qatysady. P. I. Chaıkovskıı atyndaǵy konservatorııada olar Astor Pıatsollanyń «Býenos-Aırestegi jyldyń tórt mezgili» men Arman Jaıymnyń «Keroǵly» poemasyn oryndaıdy.
Qazaqstannyń Reseıdegi mádenıet kúnderi 7-11 qyrkúıek aralyǵynda ótedi.