Reseıde Qazaqstannyń azyq-túlik ónimderiniń úlesi artyp keledi
ASTANA. QazAqparat - Reseıdegi Qazaqstannyń Saýda ókildigi Ulttyq ekonomıkadan Investıtsııalar jáne damý mınıstrligine berilip jatyr. Bul týraly Úkimet otyrysynda Investıtsııalar jáne damý mınıstri Jeńis Qasymbek málim etti, dep habarlaıdy QazAqparat.
«Reseı naryǵyna baǵyttaý boıynsha jumysty kúsheıtý maqsatynda aǵymdaǵy jyly Qazaqstandyq ónimdi ilgeriletý úshin 50-den astam is-shara ótkizilip, 100 mln AQSh dollaryna kelisimshart jasaldy. Sonymen qatar, jyl basynan beri Reseıde tek qazaqstandyq ónimderdi satatyn 20-ǵa jýyq mamandandyrylǵan dúkender ashyldy. Reseılik dúkenderde jáne sýpermarketterde qazaqstandyq azyq-túlik ónimderiniń úlesi artyp keledi. Otandyq óndiristiń ýaqtyly qyzmet kórsetýi Reseı Federatsııasynda tuz naryǵynyń 13 paıyzyn ıelenýge múmkindik berdi», - dep atap ótti mınıstr.
Sonymen qatar, Reseı Federatsııasyndaǵy Qazaqstan Respýblıkasynyń Saýda ókildigin QR Ulttyq ekonomıka mınıstrliginen Investıtsııalar jáne damý mınıstrligine berý protsesi júrip jatyr. Qazirgi kezde joba Ádilet mınıstrliginde.
