Reseıde Qazaqstannyń eki azamaty qaza tapty
ASTANA. KAZINFORM – Altaı Respýblıkasy aýmaǵynda bolǵan jol apaty saldarynan Qazaqstannyń eki azamaty kóz jumyp, taǵy bir otandasymyz jaraqat aldy. Bul jóninde QR Syrtqy ister mınıstrligi málimdedi.
– QR Syrtqy ister mınıstrligi 27 shildede Altaı Respýblıkasynyń Ulaǵan aýdanynda qaıǵyly jol-kólik oqıǵasy bolyp, saldarynan Qazaqstan Respýblıkasynyń azamattary zardap shekkenin habarlaıdy. Jergilikti quqyq qorǵaý organdarynyń málimeti boıynsha, Aqtash aýylynyń mańynda Toyota Avensis markaly avtokóliginiń júrgizýshisi qarsy qozǵalys jolaǵyna shyǵyp ketip, ishinde bes adam bolǵan Chevrolet Nexia kóligimen soqtyǵysqan. Alǵan jaraqattardyń saldarynan oqıǵa ornynda Qazaqstannyń eki azamaty qaıtys bolǵanyn tereń qaıǵyra otyryp habarlaımyz. Taǵy bir otandasymyz túrli dárejedegi jaraqat alyp, Gorno-Altaısk qalasynyń Respýblıkalyq klınıkalyq aýrýhanasyna shuǵyl túrde jetkizildi, – delingen habarlamada.
Baspasóz qyzmeti taratqan aqparatqa saı, qazir másele Syrtqy ister mınıstrliginiń baqylaýynda.
– Dıplomattarymyz jergilikti bılik oryndarymen, medıtsınalyq mekememen jáne zardap shekkenderdiń týystarymen jedel túrde baılanys ornatty. Qajetti konsýldyq-quqyqtyq kómek kórsetilip, sondaı-aq qaza tapqandardyń máıitin Otanyna tasymaldaýdy uıymdastyrýǵa járdem kórsetilip jatyr, – dep habarlady mınıstrlik.
Aıta keteıik, buǵan deıin Qazaqstanda jarty jylda jol apatynan 807 adam qaza tapqanyn jazǵanbyz.
