Reseıde Qazaqstandaǵy bank tonaý isi boıynsha adamdar qamaýǵa alyndy
ASTANA. KAZINFORM — Reseıdiń Ivanovo qalasynyń soty Qazaqstandaǵy bank tonaý isi boıynsha úsh Reseı azamatyn qamaýǵa alyp, taǵy bireýin úıqamaqqa jiberdi. Keltirilgen shyǵyn kólemi shamamen 400 mln rýbldi quraıdy, dep habarlaıdy Kazinform agenttiginiń tilshisi RIA Novostı-ge silteme jasap.
Habarlanǵandaı, sot 2024 jylǵy 11 qarashada Qazaqstan Respýblıkasy Pavlodar qalasynyń Ortalyq polıtsııa bólimi qozǵaǵan qylmystyq is aıasynda tórt adamdy qamaýǵa aldy. Іs materıaldaryna sáıkes, «Qazaqstan Halyq banki» AQ bólimshesiniń depozıtarııinen zergerlik buıymdar men aqshalaı qarajat urlanǵan. Jalpy keltirilgen shyǵyn ártúrli valıýtada shamamen 400 mln rýbldi quraıdy. Reseı azamattaryna asa iri kólemde uıymdasqan top quramynda urlyq jasady degen aıyp taǵylǵan.
Qamaýǵa alynǵandardyń biri — Ivanovo oblysy Vıchýga qalalyq okrýgindegi balalar shyǵarmashylyq ortalyǵynyń kúzetshisi. Onyń advokaty Anastasııa Terehovanyń aıtýynsha, qorǵaýyndaǵy azamattyń da, basqa aıyptalýshylardyń da tonaýǵa qatysy joq.
— Meniń qorǵaýymdaǵy azamat, onyń tanysy jáne taǵy eki Reseı azamaty tek sol kúni Pavlodarda bolǵany úshin aıyptalyp otyr. Basqa dálelder joq, tipti eki jup Reseı azamattarynyń ózara baılanysy da anyqtalmaǵan, — deıdi advokat.
Sondaı-aq advokattyń málimetinshe, jábirlenýshiler — bank te, jeke seıf ıeleri de — ázirge kúdiktilerge zalaldy óteý jóninde talap aryz túsirmegen. Sonymen birge is materıaldarynda 23 Qazaqstan azamatyna zalal keltirilgeni kórsetilgen.
Tergeý aıasynda Reseı men Qazaqstannyń quqyq qorǵaý organdary ózara yntymaqtastyqta jumys istep jatyr.
Eske salsaq, 2024 jylǵy 11 qarashaǵa qaraǵan túni Pavlodar qalasynda belgisiz adamdar Halyk Bank («Halyq banki») bólimshesine qabyrǵany buzyp kirip, zergerlik buıymdar men aqshalaı qarajatty urlap ketken.
Qarjy naryǵyn retteý jáne damytý agenttiginiń ókilderi bank bólimshesinen qansha dúnıe urlanǵanyn tergeý ǵana aıta alatynyn málimdegen.
Artynsha «Qazaqstan Halyq banki» aktsıonerlik qoǵamynyń baspasóz qyzmeti Pavlodar qalasyndaǵy bólimshesine ury túsý faktisi boıynsha júrip jatqan tergeý týraly pikir bildirgen bolatyn.
Budan buryn Pavlodardaǵy Halyk Bank-ti tonady degen kúdiktiler Reseıde ustalǵanyn jazǵanbyz.