Reseıde qazaq jaýyngeriniń súıegi tabyldy
RESEI. QazAqparat - Reseıde qazaq jaýyngeriniń súıegi tabyldy. Bul týraly Qazaqstannyń RF-daǵy elshiliginen málim etti, dep habarlaıdy QazAqparat.
«Reseıdiń «Nashe nasledıe» izdestirý birlestigi qazaq jaýyngeriniń súıegin tapty. Ol 1916 jyly týǵan Ýahıt Qaıyrhanov eken. Marqumnyń týystaryn anyqtaýǵa Ertis óńiriniń «Panfılovshylar» izdeý jasaǵy qol ushyn berdi», - delingen aqparatta.
Belgiligi bolǵandaı, Ýahıt Qaıyrhanov maıdanǵa Pavlodar oblysynan alynǵan. Qaza bolǵany jaıynda 1942 jyly qaraly qaǵaz kelgen. Biraq naqty qaı jerde jerlengeni týraly málimet bolmaǵan. Nebári 25 jasynda mert bolǵan jaýyngerdiń artynda qalǵan jalǵyz uly Zeınolla Ýahıtov ta ómirden ótken. Kelini Aısulý Ýahıtova joldasy ómirden ótkenshe ákesin kórýdi ańsap ótkenin ókinishpen eske alady. «Súıegin jetkize alsaq ulynyń janyna arýlap jerleıtin edik», - deıdi ol.
«Sol ákesin tosa-tosa ózi de ketti jarty jyl boldy. Birleý tabylypty degende ózi jylap otyratyn. 25 jasynda qaıran ketken ákem kelmedi-aý dep. Endi minekeı taǵdyr. 77 jyldan keıin joǵalǵan ákesi ulynyń janynda jatsa, bul ǵajap. Mundaı oqıǵa bola ma? Bolmaı ma? Soǵan tańym bar meniń», - deıdi Pavlodar qalasynyń turǵyny Aısulý Ýahıtova.
«Panfılovshylar» izdeý jasaǵy osy baǵyttaǵy jumysty jalǵastyrady. Eki kúnnen keıin Halyqaralyq eske alý joryǵyna qatysý úshin Tver oblysyna jolǵa shyqqaly otyrmyz. Ol 1941 jyly Qazaqstanda qurylǵan 100 jáne 101-dıvızııasy urysqa qatysyp, jeke quramynyń 75 protsentin joǵaltqan tarıhı jer», - dedi Pavlodardyń «Panfılovshylar» izdeý jasaǵynyń jetekshisi Baqytjan Ótepov.
