Reseıde qarttar úıindegi órtten 20 adam qaza taýyp, jeteýi habarsyz ketti

ASTANA. TASS-QazAqparat - Kemerovoda Tavrıcheskaıa kóshesindegi eki qabatty qarttar úıi órtendi, dep habarlaıdy QazAqparat TASS agenttigine silteme jasap.

Órt saldarynan 4 adam qaza taýyp, eki qart jaraqat alǵan.

Órt týraly sıgnal Máskeý ýaqytymen 22:21-de túsken. Órt sóndirýshiler kelgen kezde úıdiń shatyry otqa oranǵan.

Órt alańy 180 sharshy metrdi qurady. Órt týraly habarlama TJM-ne kesh túskendikten, tilsiz jaý birshama órship ketken.

Órt sóndirý isine 80-nen astam adam, 28 tehnıka jumyldyryldy.

Keıinirek Reseı TJM órt saldarynan qaza tapqandar sanynyń tórtten 13 adamǵa deıin óskenin habarlady. Sońǵy málimet boıynsha, tótenshe jaǵdaıdan 20 adam kóz jumdy.

Jeti adamnyń taǵdyry belgisiz. Kúıik shalǵan eki adam aýrýhanaǵa jetkizildi, olardyń jaǵdaıy aýyr. Taǵy tórteýi ambýlatorlyq emdeýge jiberildi.

Bul Kemerovodaǵy qarttar úıindegi alǵashqy órt emes.

8 qańtarda eki qabatty «Altyn ǵasyr» pansıonatynyń birinshi qabatynda órt shyqty. 48 adam evakýatsııalanyp, tórteýi qaıtys boldy.

Órt sóndirý qyzmeti Reseıdegi jeke úılerde kóptegen qarttar úıi jumys isteıtinin aıtty.

Olar reestrde tirkelmegendikten, órt qaýipsizdigi boıynsha tekserýden ótkizýge bolmaıdy, al órt sóndirý ınspektorlarynyń turǵyn úıge kirýine ruqsat joq.