Reseıde kartop ósiretin aýmaqtar ulǵaıtylady

ASTANA. KAZINFORM — Bıyl reseılik aýyl sharýashylyǵy óndirýshileri kartoptyń egistik kólemin 7 myń gektarǵa ulǵaıtýdy kózdep otyr, dep habarlaıdy Kazinform menshikti tilshisi.

Reseı aýyl sharýashylyǵy mınıstrliginiń habarlaýynsha, kartop egistikteriniń jalpy kólemi ótken jylǵy deńgeımen salystyrǵanda 2,3 paıyzǵa artady.

Aldyn ala málimet boıynsha 2024 jyly kartop ónimi 7,2 mln tonnany qurady, bul ortasha kópjyldyq kórsetkishterge sáıkes keledi.

Sondaı-aq, vedomstvo ótken kóktemde qaıta oralǵan aıazdarǵa, sondaı-aq odan keıin bolǵan qurǵaqshylyq pen eldiń birqatar óńirinde jaýyn-shashynnyń kóp túsýine baılanysty kartop ónimi 2023 jylǵy rekordtyq deńgeıge qaraǵanda tómendegenin atap ótti.

Osyǵan baılanysty elge 150 myń tonnaǵa deıingi kartopty bajsyz ákelý úshin tarıftik jeńildik belgilendi. Sondaı-aq, Eýrazııalyq ekonomıkalyq komıssııa elge jeńildikpen 55 myń tonnaǵa deıin sábiz ben 230 myń tonnaǵa deıin alma ákelýge ruqsat berdi.

Eske sala ketsek, Astanada «Small» jáne «Spar» saýda jelilerinde 5 keliden artyq kartop satyp alýǵa ýaqytsha shekteý qoıyldy.

Al, aýyl sharýashylyǵy mınıstrligi kartop qory ishki qajettilikti tolyq qamtamasyz etýge jetkilikti ekenin málimdegen bolatyn.