Reseıde qar kóshkininiń astynda qalǵan qazaqstandyqtyń denesi tabyldy
ASTANA. KAZINFORM – Reseıdiń Býrıatııa Respýblıkasyndaǵy «Irokında» kenishinde bolǵan qar kóshkininen Qazaqstan azamaty qaza tapty. Bul týraly QR Syrtqy ister mınıstrligi rastady.
Oqıǵa 28 sáýir kúni Mýı aýdanynda, Irokında eldi mekeninen 13 shaqyrym jerde bolǵan. Tehnologııalyq joldy tazalaý jumystaryn júrgizip jatqan toǵyz adamnyń ústine qar qulaǵan. Alǵashqy saǵattarda úsh adam óz betinshe shyǵa alǵanymen, qalǵan alty adam qar astynda qalyp qoıǵan.
Reseı Federatsııasy Tótenshe jaǵdaılar mınıstrliginiń óńirlik basqarmasy uıymdastyrǵan aýqymdy izdestirý-qutqarý sharalarynyń nátıjesinde, 29 sáýirge qaraǵan túni barlyq alty adamnyń denesi tabyldy.
Qazaqstannyń Syrtqy ister mınıstrligi qaza tapqandardyń arasynda otandasymyzdyń bar ekenin málimdedi.
– Reseı Federatsııasynyń quzyretti organdarynan alynǵan resmı aqparatqa sáıkes, qar kóshkini saldarynan 1990 jyly týǵan Qazaqstan Respýblıkasynyń azamaty A.Tıtskııdiń qaza tapqany rastalady, - dep habarlady QR SІM baspasóz qyzmetinen.
Mınıstrliktiń málimetinshe, qazirgi ýaqytta dıplomattar tıisti jumystardy júrgizip jatyr.
– Qazaqstannyń Reseıdegi Elshiligi bolǵan oqıǵanyń mán-jaıyn anyqtaý úshin Reseı Federatsııasynyń quzyretti organdarymen tikeleı baılanysta. Atalǵan másele Mınıstrliktiń baqylaýynda, - delingen resmı habarlamada.
Aıta keteıik, «Irokında» kenishi altyn óndirýmen aınalysady. Qazirgi ýaqytta apattyń sebepteri men eńbek qaýipsizdiginiń saqtalýy boıynsha tergeý amaldary bastaldy.
